ABŞ-nin San-Fransisko şəhərində sosial media fenomeni Frenki LaPenna xüsusi qəfəs döyüşündə 1,8 metr hündürlüyündə humanoid robotla qarşılaşıb. Qarşılaşma “ilk İnsan-Terminator robot döyüşü” kimi təqdim edilib.
San-Fransiskoda elmi fantastika filmlərini xatırladan qeyri-adi bir tədbir keçirilib. Tədbirdə tanınmış sosial media şəxsiyyəti Frenki LaPenna xüsusi qəfəsdə 1,8 metr hündürlüyündə humanoid robotla üz-üzə gəlib.
Qarşılaşmanı San-Fransiskoda fəaliyyət göstərən robot və əyləncə şirkəti “REK” (Robot Entertainment Kombat) təşkil edib. Şirkət bu döyüşü “ilk İnsan-Terminator robot döyüşü” kimi təqdim edib. Qarşılaşmada “EngineAI T800” markalı humanoid robotdan istifadə olunub.
Yayılan görüntülərdə robotun LaPennaya güclü yumruq və təpik zərbələri endirdiyi izlənilir. Bir anda robotun vurduğu təpikdən sonra LaPenna qəfəsin üzərindən uçaraq yerə yıxılıb.
Döyüşün yekunu ilə bağlı fərqli məlumatlar yayılıb. Bəzi mənbələr robotun texniki nokautla qalib gəldiyini bildirsə də, “REK” şirkəti LaPennanın döyüşü davam etdirərək robotu məğlub etdiyini açıqlayıb.
Görüntülərdə humanoid robotun sərbəst şəkildə insanla döyüşdüyü təəssüratı yaransa da, əslində “EngineAI T800” insan operator tərəfindən idarə olunub. Robot virtual reallıq avadanlığı və uzaqdan idarəetmə pultu vasitəsilə nəzarətdə saxlanılıb.
Robotun hansı hərəkətləri yerinə yetirəcəyini operator müəyyənləşdirib. Bununla belə, tarazlığı qorumaq və hərəkət imkanlarını təmin etmək robotun öz daxili sistemlərinin öhdəsinə düşüb.
“REK” şirkəti bundan əvvəl də insan operatorlar tərəfindən idarə olunan humanoid robotların bir-biri ilə döyüşdüyü tədbirlər təşkil edib. Şirkətin məqsədi robot döyüşlərini sadəcə texnologiya nümayişi olmaqdan çıxarıb, tamaşaçılar üçün canlı əyləncə formatına çevirməkdir.
İnsanla robotun eyni qəfəsdə üz-üzə gəlməsi isə bu konsepsiyanı yeni səviyyəyə daşıyıb.
