Bakının Binəqədi rayonunda kürəkənini qətlə yetirməkdə təqsirləndirilən ata və qızı barəsində Bakı Ağır Cinayətlər Məhkəməsində hökm elan olunub. Prosesdə cinayətin arxasında duran səbəblər açıqlanıb.
Bakının Binəqədi rayonunda baş vermiş qətl hadisəsi ilə bağlı məhkəmə araşdırması yekunlaşıb. Kürəkənini öldürməkdə təqsirləndirilən ata və qızı barəsində Bakı Ağır Cinayətlər Məhkəməsində hökm oxunub. Proses zamanı cinayətin arxasında duran hadisələrin təfərrüatları da üzə çıxıb.
Məlum olub ki, Ədil Məhərrəmov 2019-cu ildə Nuranə adlı qadınla ailə qurub. Hər ikisi üçün bu, ikinci nikah olub. Nuranənin ilk evliliyindən 2008-ci il təvəllüdlü qızı olub.
2022-ci ildə Nuranə polisə müraciət edərək bildirib ki, əri ilk evlilikdən olan yeniyetmə qızına qarşı cinayət əməli törədib. Bu iddia əsasında cinayət işi başlanılıb və istintaq aparılıb, lakin kifayət qədər sübut toplanmadığına görə Ədil Məhərrəmova qarşı cinayət təqibinə xitam verilib.
Təqib dayandırıldıqdan sonra Nuranə Məhərrəmova baş verənləri atası Nəcəf Qafarova danışıb. Ata-qız birlikdə Ədili öldürməyi qərara alıblar.
İstintaq zamanı həmçinin ortaya çıxıb ki, Nuranənin birinci həyat yoldaşı o dövrdə həbsxanada olub. Ata-qız bildiriblər ki, bu şəxs azadlığa çıxdıqda Ədili özü öldürəcəkmiş.
Məhkəmə prosesində təqsirləndirilən şəxslər iddia ediblər ki, Ədil yeniyetmə qıza qarşı cinayət törətdiyini şifahi şəkildə etiraf edib. Onların sözlərinə görə, Ədil hətta belə cavab verib:
Yaxşı edib etmişəm.
Məhkəmənin çıxardığı hökmə əsasən, Nəcəf Qafarov 19 il, qızı Nuranə Məhərrəmova isə 14 il 6 ay müddətinə azadlıqdan məhrum edilib. Hər iki şəxs xüsusi amansızlıqla adam öldürməkdə təqsirli bilinib.
