Bakının Yasamal rayonunda keçirilən kütləvi tədbir zamanı iriölçülü monitor insanların üzərinə aşıb, nəticədə bir qadın xəsarət alıb.
Bakı şəhərinin Yasamal rayonunda, Məhəmməd Naxçıvani (6-cı Paralel) küçəsində təşkil olunmuş kütləvi tədbir zamanı iriölçülü LED ekran insanların dayandığı istiqamətə aşıb.
Hadisə zamanı çəkilmiş görüntülər artıq sosial şəbəkələrdə geniş yayılıb. Məlumatlara görə, monitorun aşması ehtiyatsızlıq nəticəsində baş verib.
Baş verən qəza nəticəsində bir qadının xəsarət aldığı bildirilir. Hadisənin nə dərəcədə ciddi olması barədə hələlik dəqiq məlumat açıqlanmayıb.
Bildirilib ki, bu bədbəxt hal AYNA-nın Mikromobillik həftəsi çərçivəsində keçirdiyi "Avtomobilsiz gün" adlı tədbir zamanı yaşanıb. Hadisə ilə bağlı əlavə məlumatların açıqlanacağı gözlənilir.
