Corc Vaşinqton Universitetinin nümayəndə heyəti SOCAR-ın Bakı Ali Neft Məktəbinə səfər edərək təhsil müəssisəsinin imkanları ilə tanış olub və əməkdaşlıq perspektivlərini müzakirə edib.
ABŞ-nin Corc Vaşinqton Universitetindən bir qrup rəhbər şəxs Bakı Ali Neft Məktəbinə (BANM) səfər edib. Nümayəndə heyətinə universitetin Qlobal akademik tərəfdaşlıqlar üzrə prorektoru Sevinc Məmmədova rəhbərlik edib.
Heyətin tərkibinə Elliott Beynəlxalq Münasibətlər Məktəbinin dekanı Ben Hopkins, Təhsil və İnsan İnkişafı üzrə Ali Məktəbin dekanı Lionel Hovard, həmçinin Mühəndislik və Tətbiqi Elmlər Məktəbinin dekanı Jason Zara daxil olub.
BANM-in rektoru Elmar Qasımov qonaqlara məktəbin fəaliyyət istiqamətləri, təhsil imkanları, akademik potensialı və xarici tərəfdaşlarla qurduğu beynəlxalq əlaqələr haqqında ətraflı məlumat verib.
Görüş çərçivəsində tərəflər yüksəkixtisaslı mütəxəssislərin hazırlanması sahəsində birgə fəaliyyət imkanlarını nəzərdən keçiriblər. Hər iki tərəf gələcək tərəfdaşlığa dair maraqlarını bildirib.
Amerikalı qonaqlar BANM-in tədris bazası və infrastrukturunu, o cümlədən laboratoriyaları və Rəqəmsal Biliklər Liseyini yerində gəzərək müşahidə ediblər. Nümayəndə heyəti burada yaradılan müasir tədris mühitini yüksək dəyərləndirib.
Səfərin davamında Corc Vaşinqton Universitetinin təmsilçiləri BANM-in akademik və inzibati işçiləri ilə də görüşüblər. Bu görüşdə əməkdaşlığın müxtəlif aspektləri ətrafında fikir mübadiləsi aparılıb.
Səfər çərçivəsində ABŞ-lı qonaqlar BANM-in tələbələri ilə də bir araya gəliblər. Görüş zamanı tələbələrin verdiyi suallar cavablandırılıb.
