Pirallahı rayonunda 24-25 sentyabr 2026-cı il tarixlərində “27 Sentyabr – Anım Günü” münasibətilə bir sıra tədbirlər həyata keçirilib.
Pirallahı Rayon İcra Hakimiyyətinin təşkilatçılığı ilə keçirilən tədbirlər çərçivəsində ağacəkmə aksiyası təşkil olunub, şəhid məzarları və “Vətən uğrunda” abidə kompleksi ziyarət edilib, həmçinin şəhid ailələri ilə görüşlər olub.
24 sentyabr tarixində Pirallahı Rayon İcra Hakimiyyəti ilə Bakı Şəhər Gənclər və İdman İdarəsinin birgə səyi nəticəsində Səməd Vurğun küçəsində ağac əkin aksiyası reallaşdırılıb.
Tədbirdə Rayon İcra Hakimiyyətinin başçısı Vasif İmanov, YAP Pirallahı rayon təşkilatının sədri Emil Abasov, Bakı Şəhər Gənclər və İdman İdarəsinin rəisi Dənyar Teymurlu, Pirallahı Bələdiyyəsinin sədri Əli Kərimov, həmçinin icra hakimiyyəti aparatının məsul işçiləri, müxtəlif idarə və müəssisələrin rəhbərləri, gənclər və şagirdlər iştirak edib.
Aksiya nəticəsində 150-dən artıq şam ağacı torpağa əkilib. Əkilən ağacların gələcəkdə düzgün qorunması və müntəzəm suvarılması üçün lazımi tədbirlərin görüləcəyi bildirilib.
25 sentyabr tarixində rayon rəhbərliyi Gürgən qəsəbəsindəki qəbiristanlığa gedərək şəhidlərin uyuduğu yerləri ziyarət edib. Məzarların üzərinə qırmızı-ağ-yaşıl rəngli gül dəstələri qoyulub, şəhidlərin ruhu üçün dua oxunub.
Bundan sonra Vasif İmanovun başçılıq etdiyi nümayəndə heyəti “Vətən uğrunda” abidə kompleksinə üz tutub. Burada Azərbaycan xalqının ümummilli lideri Heydər Əliyevin, eləcə də ölkənin ərazi bütövlüyü yolunda həlak olan şəhidlərin xatirəsi bir dəqiqəlik sükutla anılıb.
Sükutdan sonra Dövlət Himni səsləndirilib və abidə kompleksinin qarşısına gül dəstələri qoyulub.
Gün ərzində rayon rəhbərliyi şəhid ailələrini də ziyarət edib, ailə üzvlərinin gündəlik problemləri və qayğıları ilə yaxından tanış olub.
