Qanunsuz odlu silah saxlama və dələduzluq ittihamları ilə axtarışda olan M.Mirzəyev saxlanılarkən polis əməkdaşlarına silahlı müqavimət göstərib və zərərsizləşdirilib.
Daxili İşlər Nazirliyinin (DİN) Mətbuat xidmətindən bildirilib ki, qanunsuz odlu silah saxlama və dələduzluq cinayətlərinə görə axtarışda olan M.Mirzəyev saxlanılarkən polis əməkdaşlarına silahla müqavimət göstərib.
Qeyd olunub ki, həmin şəxs bundan əvvəl də qəsdən adamöldürmə, qanunsuz olaraq odlu silah əldə etmə və saxlama, soyğunçuluq, qaçaqmalçılıq, habelə narkotik vasitələrin qanunsuz dövriyyəsi ilə bağlı cinayətlərə görə məhkum edilib.
DİN-in məlumatına əsasən, M.Mirzəyevin göstərdiyi silahlı müqavimətə cavab olaraq polis əməkdaşları tabel silahından istifadə edib və şəxs zərərsizləşdirilib.
Hadisə yerində aparılan axtarış zamanı “Makarov” markalı tapança aşkarlanaraq götürülüb.
Faktla əlaqədar aidiyyəti dövlət qurumları tərəfindən müvafiq araşdırma davam etdirilir.
