Milli Məclisin deputatı Naqif Həmzəyev bildirib ki, Bakı, Gəncə və Sumqayıtda tikinti işlərinin nizamsız aparılması ciddi problemlərə yol açır.
Milli Məclisdə keçirilən iclasda çıxış edən deputat Naqif Həmzəyev qeyd edib ki, Bakı, Gəncə və Sumqayıt şəhərlərində tikinti işlərinin qaydasız şəkildə həyata keçirilməsi bir sıra ciddi problemlər yaradır.
Onun sözlərinə görə, səs-küyə səbəb olan tikinti işləri çox zaman gecə saatlarında və ya həftə sonları görülür ki, bu da sakinlərin istirahət hüququnun pozulmasına gətirib çıxarır.
“Səs-küyə səbəb olan işləri ya gecə saatları, ya da həftə sonları həyata keçirirlər. Bu da insanların istirahət hüququnu pozur. İnsanların istirahət hüququ pozulanda da işdə verimli olmurlar.”
Deputat vurğulayıb ki, dünya ölkələrində şəhərlərdə səs-küy səviyyəsinin ölçülməsi məsələsi artıq 20 ilə yaxındır ki, ciddi tədqiqat mövzusuna çevrilib. Onun sözlərinə görə, Azərbaycanda isə bu istiqamətdə hər hansı sistemli araşdırma aparılmır.
“Artıq son 20 ildir dünyada şəhərlərin səs indikatoru üzrə işlər ciddi şəkildə araşdırılır. Amma bizdə bu problem araşdırılmır.”
Naqif Həmzəyev bildirib ki, bu sahədə fəaliyyət göstərən dövlət qurumları arasında əlaqələndirmə mövcud deyil və hər qurum problemin həllini digərinin öhdəsinə buraxır.
“Qurumlar arasında da bu problemin aradan qaldırılması üzrə koordinasiya yoxdur. Hansından soruşursan, bir-birinin üzərinə atır. İstər Ekologiya Nazirliyi, istər Şəhərsalma və Arxitektura Komitəsi, icra hakimiyyətləri və bələdiyyə - hamısı məsələni bir-birinin üstünə atır.”
Deputat bu sözləri Milli Məclisdə keçirilən iclas zamanı səsləndirib.
