Şəmkirdə 2013-cü il avqustun 5-də 56 yaşlı Kifayət Məhərrəmovanın xüsusi amansızlıqla öldürülməsi faktı üzrə istintaq başa çatıb, cinayəti törədən şəxs müəyyən edilib.
Baş Prokurorluq və Daxili İşlər Nazirliyinin birgə səyləri nəticəsində uzun illər açılmamış qalan ağır cinayətlərdən birinin üstü açılıb. Söhbət 2013-cü il avqustun 5-də Şəmkir şəhərində baş vermiş qətldən gedir.
Həmin gün saat 20 radələrində 56 yaşlı Kifayət Məhərrəmova öz mənzilində xüsusi amansızlıqla qəsdən öldürülüb. Bu fakt üzrə Cinayət Məcəlləsinin 120.2.4-cü maddəsi ilə cinayət işi başladılmış və istintaq Baş Prokurorluğun İstintaq idarəsinə həvalə edilmişdi.
Baş Prokurorluq və Daxili İşlər Nazirliyinin aidiyyəti qurumları uzun müddət koordinasiyalı şəkildə istintaq və əməliyyat-axtarış tədbirləri həyata keçiriblər. Aparılan işlər nəticəsində Şəmkir rayon sakini Xəyal Məmmədovun bu cinayətdə iştirakına dair əsaslı şübhələr yaranıb.
Məlum olub ki, Xəyal Məmmədov tamah məqsədi ilə Kifayət Məhərrəmovanın yaşadığı mənzilə daxil olub, ona cib bıçağı ilə çoxsaylı zərbələr endirərək xüsusi amansızlıqla öldürüb. Bundan sonra o, mənzildən 100 manat pul və çoxsaylı qızıl-zinət əşyaları götürərək hadisə yerindən uzaqlaşıb.
İstintaq zamanı Xəyal Məmmədov şübhəli şəxs qismində dindirilib və verdiyi ifadədə, habelə ifadənin yerində yoxlanılması prosesində cinayəti törətdiyini etiraf edib.
Nəticədə X.Məmmədov Cinayət Məcəlləsinin 120.2.4-cü (xüsusi amansızlıqla adam öldürmə) və 120.2.5-ci (tamah məqsədi ilə adam öldürmə) maddələri ilə təqsirləndirilən şəxs qismində cəlb olunub, ona ittiham elan edilib. Müstəntiqin vəsatəti və ibtidai araşdırmaya prosessual rəhbərliyi həyata keçirən prokurorun təqdimatı əsasında Şəmkir Rayon Məhkəməsi barəsində həbs qətimkan tədbiri seçib.
Hazırda cinayət işi üzrə zəruri istintaq və əməliyyat-axtarış tədbirləri davam etdirilir.
Qeyd olunub ki, ötən illərdə açılmamış qalan cinayətlərin, o cümlədən itkin düşmüş şəxslərlə bağlı faktların araşdırılması Baş Prokurorluq və Daxili İşlər Nazirliyi tərəfindən daim nəzarətdə saxlanılır. Aidiyyəti qurumların qarşılıqlı əməkdaşlığı çərçivəsində bu istiqamətdə kompleks tədbirlər davam etdirilir.
