Bakının «Saxara» gözəllik salonunda çalışan bir işçi SMM vəzifəsinə götürülsə də, ondan xadimə və ofisiant kimi istifadə edildiyini bildirib.
«Saxara» gözəllik salonunun «Blue Mall» filialında çalışmış bir işçi əmək şəraiti ilə bağlı ciddi iddialar səsləndirib. Şikayətçi bu barədə «APA TV»yə açıqlama verib.
Onun sözlərinə görə, salona SMM mütəxəssisi kimi işə qəbul edilsə də, əsl vəzifəsindən kənar bir sıra işlər görməyə məcbur edilib.
Əvvəlcə demişdilər ki, əmək müqaviləsi də olacaq, lakin olmadı. Ümumiyyətlə “Blue Mall” filialındakı heç bir işçinin əmək müqaviləsi yox idi. Maaşımın da yarısını kartdan-karta göndərdilər, sonra dedilər ki, “işə sabahdan gəlmə”. Maaşımın tam hissəsini tələb etsəm də, vermədilər. Bizə nahar fasiləsi də verilmirdi.
Şikayətçi bildirib ki, müştərilərə çay xidmətini də məhz onlar həyata keçiriblər.
Müştərilərə çayı biz gətirirdik. Masaj otaqlarının yığışdırılması, otağa nəzarət etmək kimi tələblər var idi. “Matrix” qabının içinə “Hacı Şakir”i doldururdular. Saç baxımını elə edirdilər. Bizi xadimə, ofisiant kimi istifadə edirdilər. Bunlardan narazılığımı bildirdikdə isə mənə hədə-qorxu gəldilər.
İddialarla bağlı «Saxara» gözəllik salonunun rəhbəri Sərxan Qulamlı bildirib ki, məsələdən xəbərdar deyil və bunun qarayaxma kampaniyası olduğunu vurğulayıb.
