"Azərişıq" ASC-nin təşkilatçılığı ilə keçirilən "Yeni nəsil energetiklər: Şəbəkənin memarları" respublika yarışının növbəti regional mərhələsi Naxçıvanın Babək rayonunda baş tutub. Tədbirdə 8 komanda öz bilik və bacarıqlarını sınayıb.
Naxçıvan Regional Enerji Təchizatı və Satışı İdarəsi (RETSİ) üzrə təşkil olunan yarış Babək Elektrik Şəbəkəsinin ərazisində keçirilib. Açılış mərasimi Azərbaycan Respublikasının Dövlət Himninin səsləndirilməsi ilə başlayıb.
Rəsmi hissədə iştirakçılara və qonaqlara maarifləndirmə proqramının hansı məqsədlə həyata keçirildiyi barədə ətraflı izahat verilib. Qeyd olunub ki, bu formatda yarışların təşkili sahədə peşəkar kadrların yetişdirilməsinə və gənc energetiklərin formalaşmasına töhfə verir.
Yarışın birinci mərhələsində "Babək EŞ", "Culfa EŞ", "Kəngərli EŞ", "Naxçıvan EŞ", "Ordubad EŞ", "Sədərək EŞ", "Şahbuz EŞ" və "Şərur EŞ" komandaları intellektual yarışda qarşı-qarşıya gəlib.
Komandalara ümumilikdə 20 açıq tipli sual təqdim olunub və onlar bu suallara cavab verməklə nəzəri hazırlıqlarını nümayiş etdiriblər.
Yarışın ikinci mərhələsi praktiki tapşırıqlara həsr olunub. Komandalar özlərinə verilən 3 praktiki tapşırığı yerinə yetirərək peşə bacarıqlarını əyani şəkildə göstərməli olublar.
Hər iki mərhələnin yekun nəticələrinə əsasən Babək regional turunun qalibi "Şahbuz EŞ" komandası olub. Bununla da komanda Ümumrespublika Yarışının Hadrut şəhərində keçiriləcək final mərhələsinə çıxış hüququ əldə edib.
"Azərişıq" ASC ölkənin müxtəlif regionlarında bu qəbildən maarifləndirici tədbirlər və yarışlar keçirməkdə davam edir. Bildirilib ki, Səhmdar Cəmiyyətin əməkdaşlarının peşə bilik və bacarıqlarının artırılması, təhlükəsizlik qaydalarına riayət olunması və insan həyatının qorunması məqsədilə bu cür tədbirlər gələcəkdə də təşkil ediləcək.
