Pirallahı Rayon İcra Hakimiyyətinin başçısı Vasif İmanovun rəhbərliyi ilə RİH əməkdaşları və rayon ictimaiyyətinin nümayəndələri antiterror əməliyyatları şəhidi kiçik leytenant Tural Cahangirovun məzarını ziyarət ediblər.
Pirallahı Rayon İcra Hakimiyyətinin başçısı Vasif İmanovun rəhbərliyi ilə RİH-in məsul əməkdaşları və rayon ictimaiyyətinin nümayəndələri şəhid kiçik leytenant Tural Cahangirovun məzarını ziyarət ediblər. Məzar önünə gül dəstələri düzülüb, şəhidin əziz xatirəsi ehtiramla yad olunaraq ruhuna dualar oxunub.
Anım mərasimində çıxış edən Vasif İmanov Tural Cahangirovun ailəsinə dərin hüznlə başsağlığı verib. O bildirib ki, şəhidimizin xatirəsi hər zaman xalqımızın yaddaşında yaşayacaq və qürurla anılacaq.
Çıxışında Vasif İmanov Müzəffər Ali Baş Komandan İlham Əliyevin rəhbərliyi ilə həyata keçirilən 44 günlük Vətən müharibəsindən və 23 saatlıq antiterror tədbirlərindən danışıb. O, bu döyüşlərdə Azərbaycan Ordusunun göstərdiyi qüdrətdən və şəhidlərin qəhrəmanlığından bəhs edib.
Rəşadətli Azərbaycan Ordusunun əsgər və zabitləri, hərbçiləri döyüş meydanında göstərdikləri şücaətlə düşmənə layiqli yerini göstərməklə yanaşı, dövlətimizin və ordumuzun gücünü, qüdrətini də bütün dünyaya nümayiş etdirdi.
İmanov həmçinin qeyd edib ki, suverenliyimizin bərpası ilə üçrəngli bayrağımız bütün ölkə ərazisində qürurla dalğalanır.
Mərasimin sonunda şəhidin ruhuna ehsan verilib. Kiçik leytenant Tural Cahangirovun əziz xatirəsi bir daha ehtiramla yad edilərək ruhuna dualar oxunub.
Şəhid ailəsi göstərilən diqqət və qayğıya görə Prezident İlham Əliyevə və xanımı Mehriban Əliyevaya minnətdarlığını bildirib.
