Taylandın paytaxtı Banqkokda güclü yağışlardan yaranan daşqınlar səbəbindən şəhərin bütün 50 rayonu fəlakət zonası elan edilib.
Taylandın paytaxtı Banqkokda leysan yağışların törətdiyi daşqınlar nəticəsində şəhərin bütün 50 rayonu fəlakət zonası statusu alıb. Xüsusilə Banqkokun şərq bölgələrində kanalların daşması əsas yolların su altında qalmasına gətirib çıxarıb.
Şəhərə vurulan ziyanın böyüklüyü və sakinlərin gündəlik həyatına ciddi mane olması nəzərə alınaraq belə bir qərar qəbul edilib. Banqkok Metropoliten Administrasiyası (BMA) bildirib ki, bu addım zərər çəkmiş bölgələrdə yardımın daha operativ və əlaqələndirilmiş şəkildə həyata keçirilməsinə xidmət edəcək.
Yerli hakimiyyət nümayəndələri kanal yaxınlığında yaşayanların xüsusi risk altında olduğunu vurğulayıblar. Onlar yağışın davam etməsi ehtimalını nəzərə alaraq sakinləri qiymətli əşyalarını və avtomobillərini daha hündür yerlərə köçürməyə çağırıblar.
Rəsmi məlumata görə, daşqından zərər çəkən ərazilərdə yataqdan qalxa bilməyən xəstələr xəstəxanalara aparılacaq. Evlərini tərk etməli olan sakinlər isə BMA ilə əməkdaşlıq edən məktəb binalarında müvəqqəti yerləşdiriləcək.
Meteoroloji proqnozlara görə, Taylandda güclü yağışların sentyabrın 27-dək davam edəcəyi ehtimal olunur. Bu səbəbdən hakimiyyət orqanları vəziyyəti daim izləyərək əlavə tədbirlər görməyə hazırlaşır.
