İngiltərədə ifrat sağçı fəal Daniel Tomas La-Manş kanalında miqrantları daşıyan qayığa bıçaqla zərər vurub, hadisə kameraya düşüb.
İngiltərədə tanınan ifrat sağçı fəal Daniel Tomasın La-Manş kanalında miqrant daşıyan qayığa bıçaqla hücum etdiyi görüntülər sosial şəbəkələrdə yayılıb. "Denni Tommo" ləqəbi ilə tanınan fəalın Fransadan gələn iki qayığı izlədiyi, sonra onlardan birinə yaxınlaşaraq qayığın yan tərəfinə dəfələrlə bıçaqla zərbə endirdiyi qeydə alınıb.
Görüntülərə görə, həmin an qayıqda xilasedici xidmət işçisi də olub. Tomas ona qayıqdan düşməsini tələb edərək belə deyib:
Bura İngiltərədir. Bura artıq Fransa deyil.
Bıçaqlama hadisəsi Qosport şəhərində miqrantlara qarşı keçirilən etiraz aksiyaları zamanı baş verib. Həmin etirazlarla əlaqədar müxtəlif cinayət ittihamları ilə altı nəfər saxlanılıb.
Yardım təşkilatları Daniel Tomasın davranışını sərt şəkildə tənqid edib. "İrqçiliyə Qarşı Ayaqda Qal" adlı qrup baş verənləri "iyrənc" adlandırıb.
Məlumatlara görə, Daniel Tomas miqrant əleyhinə fəaliyyət göstərən "Patriot Platform" qrupunun üzvüdür və məşhur ifrat sağçı fiqur Tommi Robinsonun tərəfdarı kimi tanınır. Bildirilib ki, o, keçmişdə cinayət törətdiyinə görə artıq bir dəfə həbs cəzası çəkib.
