Azərbaycan Xarici İşlər Nazirliyi Gürcüstan Patriarxlığının ölkəmizin ərazisindəki Kürmük məbədi ilə bağlı açıqlamasını iki ölkə arasındakı dostluq ruhuna zidd adlandırıb.
Azərbaycan Xarici İşlər Nazirliyi Gürcüstan Patriarxlığının Kürmük məbədinə dair verdiyi son açıqlamaya kəskin etiraz bildirib. Nazirliyin yaydığı bəyanatda bu açıqlamanın Azərbaycan ilə Gürcüstan arasındakı dostluq, tərəfdaşlıq və mehriban qonşuluq münasibətlərinin əsasını sarsıtdığı vurğulanıb.
“Gürcüstan Patriarxlığının Azərbaycanın ərazisində yerləşən Kürmük məbədi ilə bağlı verdiyi son açıqlama Azərbaycan ilə Gürcüstan arasında mövcud olan dostluq, tərəfdaşlıq və mehriban qonşuluq münasibətlərinin ruhuna ziddir”
Bəyanatda bildirilib ki, Azərbaycanın ərazisində yerləşən coğrafi və tarixi adların başqa formada təqdim olunması yolverilməzdir. Nazirlik vurğulayıb ki, Azərbaycan tərəfi həmişə Gürcüstanın ərazi bütövlüyünə və suverenliyinə hörmət göstərib.
“Azərbaycan ərazisində yerləşən coğrafi və tarixi toponimlərin digər adlarla təqdim edilməsi qəbuledilməzdir. Azərbaycan hər zaman Gürcüstanın ərazi bütövlüyünə və suverenliyinə hörmətlə yanaşıb. Eyni zamanda, Gürcüstan tərəfinin də Azərbaycanın ərazi bütövlüyünə və suverenliyinə eyni münasibət sərgiləməsi iki ölkə arasında formalaşmış strateji tərəfdaşlıq münasibətlərinin mühüm əsasını təşkil edir. Məhz bu baxımdan, Gürcüstan Patriarxlığının Azərbaycanın ərazi bütövlüyünə və suverenliyinə münasibətdə ərazi iddialarını ehtiva edən yanaşması anlaşılan deyil.”
Nazirlik dini təşkilatların iki xalq arasında əsrlərdir mövcud olan dostluq və qonşuluq münasibətlərinə zərər vura biləcək addımlardan uzaq durmasının vacibliyini bildirib. Bununla yanaşı, Gürcüstan Patriarxlığına Ermənistan kilsəsinin oxşar mövqeyini təkrarlamaması tövsiyə olunub.
“Dini qurumların Azərbaycan və Gürcüstan xalqları arasında əsrlər boyu formalaşmış tarixi dostluq və mehriban qonşuluq münasibətlərinə xələl gətirə biləcək yanaşmalardan çəkinməsi vacibdir. Bununla əlaqədar, Gürcüstan Patriarxlığı tərəfindən Ermənistan kilsəsinin məlum yanaşmalarının təkrarlanması və onun yolu ilə gedilməsi məsləhət görülmür.”
Bəyanatın sonunda Azərbaycan Xarici İşlər Nazirliyi ölkə ərazisindəki bütün tarixi, mədəni və dini abidələrin milli irsin ayrılmaz hissəsi olduğunu bir daha xatırladıb.
“Azərbaycan ərazisində mövcud olan bütün tarixi, mədəni və dini abidələr Azərbaycan xalqının və Azərbaycan dövlətinin milli irsinin ayrılmaz tərkib hissəsidir”
