İspaniyaya məxsus Seuta anklavının ərazisinə kütləvi şəkildə keçmək üçün sosial şəbəkələrdə yeni çağırışlar yayılıb, keçid tarixi olaraq Mərakeşdə parlament seçkilərinin keçirildiyi 23 sentyabr seçilib.
İspaniyaya məxsus Seuta anklavının ərazisinə kütləvi keçidlə bağlı sosial şəbəkələrdə yeni çağırışlar yayılıb. Bu barədə "Canal Sur" teleradiosu məlumat yayıb.
Yayılan məlumata əsasən, sərhədi keçmək üçün 23 sentyabr tarixi müəyyənləşdirilib. Məhz həmin gün Mərakeş parlamentinin aşağı palatası olan Nümayəndələr Palatasına ümumi seçkilər keçiriləcək.
"Facebook" sosial şəbəkəsində bu çağırışların yayıldığı qruplardan birində 91 mindən artıq istifadəçinin olduğu qeyd olunur.
İspaniyanın Mərakeşdəki səfirliyi isə xəbərdarlıq yayıb ki, Seuta və Melilya anklavlarına qeyri-qanuni yolla keçid ölkənin Avropa hissəsinə giriş, orada qalma və ya Avropa İttifaqı ərazisində sərbəst hərəkət etmək hüququ vermir.
Xatırladaq ki, iyulun 30-da Mərakeşin Fenidek sahil bölgəsindən minlərlə miqrant üzərək və ya piyada yolla Seuta və Melilya anklavlarına keçməyə cəhd edib. Bu hadisədən sonra İspaniya hökuməti bölgəyə əlavə hərbi qüvvələr göndərib və sərhəd təhlükəsizliyini gücləndirib.
Məlumatlara görə, İspaniya ərazisinə qeyri-qanuni keçid zamanı 100-ə yaxın şəxs həlak olub.
