"Neftçi" Azərbaycan çempionatlarının yüksək dəstəsində karyerasında 550-ci qələbəsini qeydə alıb, bu nəticə klubun yubiley – 1000-ci oyununa təsadüf edib.
"Neftçi" Azərbaycan çempionatlarının yüksək dəstəsində 550-ci qələbəsinə imza atıb. Peşəkar Futbol Liqasının rəsmi saytında bildirilir ki, bu uğur komandanın yubiley xarakterli 1000-ci oyununda əldə olunub.
Bakı klubu Misli Premyer Liqasının VI turunda səfərdə "Qəbələ" ilə üz-üzə gəlib və rəqibini 3:0 hesabı ilə məğlub edib. Bu qələbə "Neftçi"nin karyerasında 242-ci səfər qələbəsi kimi tarixə düşüb.
Klubun ümumi 550 qələbəsinin əksəriyyəti öz meydanında qazanılıb. "Ağ-qaralar" ev meydanında 301, neytral meydanlarda isə 7 dəfə qalib gəlib.
Bu göstərici ilə "Neftçi" Azərbaycan futbolu tarixində 550 və ya daha çox qələbə toplayan ikinci komandaya çevrilib. Bu sırada birinci yeri "Qarabağ" tutur.
Qeyd etmək lazımdır ki, "Neftçi"nin çempionatlardaki ilk qələbəsi çox əvvəl, 1992-ci il mayın 8-də qeydə alınıb. O zaman Bakı klubu öz meydanında Sumqayıtın "Xəzər" komandasını 1:0 hesabı ilə məğlub edib.
