Kənd təsərrüfatı naziri Məcnun Məmmədov bildirib ki, Azərbaycanda hazırda 130 min hektar sahədə müasir suvarma sistemləri tətbiq olunur.
Kənd təsərrüfatı naziri Məcnun Məmmədov İkinci Azərbaycan Beynəlxalq İnvestisiya Forumu çərçivəsində keçirilən "Aqrobiznesdə innovasiya və texnoloji inkişaf" mövzulu sessiyada çıxış edib. Nazir kənd təsərrüfatı sahəsində yeni yanaşmaların zəruriliyini vurğulayıb.
"Qlobal iqlim dəyişikliyi, təbii ehtiyatlara artan təzyiq, təchizat zəncirindəki dəyişikliklər və əhalinin artımı kənd təsərrüfatında yeni yanaşmaları son dərəcə vacib edir"
Məmmədovun sözlərinə görə, sektorun qarşısında duran əsas hədəf təkcə istehsal həcmini artırmaq deyil, mövcud ehtiyatlardan gündəlik səviyyədə daha rasional istifadə etməkdir. O bildirib ki, bu yanaşma daha məhsuldar, dayanıqlı və yüksək əlavə dəyərli aqrar sistemin qurulmasına xidmət edir.
Nazir ölkənin kənd təsərrüfatı istiqamətində əldə etdiyi nəticələrə toxunub və bunu belə şərh edib:
"Azərbaycan kənd təsərrüfatı sektorunun inkişafına məhz bu rakursdan yanaşır. Azərbaycanın kənd təsərrüfatı sektoru əhəmiyyətli irəliləyiş nümayiş etdirib. Bu gün biz fındıq, xurma, şaftalı və nektarin, eləcə də son bir neçə ildə çiyələk, gilas, pomidor və pambıq lifi kimi məhsulların aparıcı qlobal istehsalçıları və ixracatçıları sırasında yer almışıq"
Onun sözlərinə görə, bu nailiyyətlər ölkənin aqrar sənayesinin beynəlxalq bazarlarda rəqabət qabiliyyətinin artdığını göstərir.
Nazir su resurslarının qorunub saxlanmasının Azərbaycan üçün strateji əhəmiyyət daşıdığını qeyd edib. Onun sözlərinə görə, bu istiqamətdə artıq konkret addımlar atılıb.
Məmmədov bildirib ki, hazırda ölkədə təxminən 130 000 hektar sahədə müasir suvarma sistemləri istifadə olunur. Bu, kənd təsərrüfatında su ehtiyatlarının daha səmərəli idarə olunmasına imkan yaradır.
