"Azərbaycan Dəmir Yolları" (ADY) sədri Rövşən Rüstəmovun rəhbərlik etdiyi nümayəndə heyəti Almaniyaya səfəri çərçivəsində Hamburq Limanının rəhbərliyi ilə görüşüb və əməkdaşlıq protokolu imzalayıb.
AZCON Holding tərkibinə daxil olan "Azərbaycan Dəmir Yolları" QSC-nin (ADY) nümayəndə heyəti Almaniya Federativ Respublikasına səfəri zamanı Hamburq Limanının rəhbərləri ilə görüş keçirib. Görüşdə limanın yükdaşıma üzrə törəmə qurumu olan "Metrans" şirkətinin təmsilçiləri də iştirak edib.
Tərəflər Bakı və Hamburq limanları arasındakı əlaqələrin dərinləşdirilməsini, liman-logistika zəncirinin təkmilləşdirilməsini və Orta Dəhliz boyunca tranzit potensialının artırılmasını müzakirə edib.
Söhbət zamanı Avropa-Asiya istiqamətində yük axınlarının artdığı qeyd olunaraq, dəmir yolu və dəniz nəqliyyatı arasında sıx əlaqənin vacibliyi diqqətə çatdırılıb. Bundan əlavə, multimodal daşımaların genişləndirilməsi, konteyner yükdaşımalarının həcminin yüksəldilməsi və logistika proseslərinin rəqəmsallaşdırılması kimi məsələlər də araşdırılıb.
Görüş iştirakçıları həmçinin Hamburq Limanının uzunmüddətli beynəlxalq təcrübəsindən - xüsusən liman əməliyyatlarının idarəçiliyi, logistika mərkəzlərinin fəaliyyəti və rəqəmsal texnologiyaların tətbiqi sahəsindəki bilgilərin bölüşdürülməsinin əhəmiyyətini vurğulayıb.
Bildirilib ki, Bakı Limanında müasir avadanlıq və texnologiyaların tətbiqinin genişləndirilməsi, eləcə də dəmir yolu ilə liman əməliyyatlarının əlaqələndirilməsinin gücləndirilməsi Orta Dəhlizin rəqabət qabiliyyətini yüksəltməkdə mühüm rol oynayır.
Görüşün sonunda ADY ilə Hamburq Limanı arasında əməkdaşlığın inkişafına yönəlik protokol imzalanıb. Sənədə əsasən tərəflər arasında təcrübə mübadiləsi genişləndiriləcək, birgə layihələr həyata keçiriləcək və logistika sahəsində yeni əməkdaşlıq istiqamətləri müəyyənləşdiriləcək.
