Sentyabrın 18-də Biləsuvar rayonunda 2026–2030-cu illər üzrə Dövlət Proqramı çərçivəsində görülən işlərlə bağlı iri fermer təsərrüfatlarına baş çəkilib və rayon rəhbərliyi ilə görüş keçirilib.
Sentyabrın 18-də Biləsuvar rayonunda Azərbaycan Prezidentinin 25 may 2026-cı il tarixli 1044 nömrəli Fərmanı ilə təsdiq edilmiş "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı" çərçivəsində aparılan işlərlə tanışlıq üçün səfər təşkil olunub.
Səfərdə Biləsuvar Rayon İcra Hakimiyyətinin başçısı Faiq Qürbətov, Prezident Administrasiyasının Ərazi-təşkilat məsələləri şöbəsinin 5-ci ərazi sektorunun müdiri Dəyanət Abdullayev, Kənd Təsərrüfatı Nazirliyinin Bitkiçiliyin təşkili və monitorinqi şöbəsinin müdiri Pərviz Yusifov, Biləsuvar Rayon Su Meliorasiya Sistemlərinin İstismarı İdarəsinin rəisi Ədalət Babayev və Biləsuvar Rayon Dövlət Aqrar İnkişaf Mərkəzinin direktoru Nurəddin Quliyev iştirak edib. Nümayəndə heyəti rayonun iri fermer təsərrüfatlarına baş çəkərək istehsal imkanları və inkişaf perspektivləri ilə tanış olub.
Baxış zamanı müəssisələrin fəaliyyət istiqamətləri müzakirə edilib. Dövlət Proqramından irəli gələn vəzifələrin icrası, yeni istehsal güclərinin yaradılması, müasir texnologiyaların tətbiqi, məhsuldarlığın artırılması və ixrac imkanlarının genişləndirilməsi mövzusunda fikir mübadiləsi aparılıb.
Baxışdan sonra Biləsuvar Rayon İcra Hakimiyyətində yaradılmış Qərargahın üzvləri, eləcə də kənd təsərrüfatı məhsullarının istehsalı və emalı ilə məşğul olan təsərrüfatların nümayəndələrinin qatıldığı görüş keçirilib. Görüşün əsas məqsədi zona müşavirəsində və ötən müddət ərzində yerli sahibkarlar tərəfindən irəli sürülmüş təşəbbüslərin gedişatını təhlil etmək, həmçinin Dövlət Proqramı çərçivəsində həyata keçirilən digər tədbirlərin cari vəziyyətini nəzərdən keçirmək olub.
Rayon İcra Hakimiyyətinin başçısı Faiq Qürbətov çıxışında Prezident İlham Əliyevin sədrliyi ilə aqrar sektorun prioritetlərinə həsr olunmuş müşavirəyə istinad edərək, kənd təsərrüfatının inkişafı, ərzaq təhlükəsizliyinin gücləndirilməsi və sahənin dayanıqlı inkişafı istiqamətində qarşıya qoyulan vəzifələrin əhəmiyyətini vurğulayıb.
Qürbətov ölkə rəhbərliyinin müəyyənləşdirdiyi strateji hədəflərə uyğun olaraq Biləsuvar rayonunda görülən işlər barədə ətraflı məlumat verib. Onun sözlərinə görə, rayonda kənd təsərrüfatının inkişafını sürətləndirmək, əkin sahələrindən səmərəli istifadəni təmin etmək, məhsuldarlığı artırmaq və mövsümi işləri əlaqələndirmək üçün xüsusi Qərargah fəaliyyət göstərir.
Bildirilib ki, bu Qərargah fermerlərin və torpaq mülkiyyətçilərinin problemlərinin operativ həllinə yönəlik addımlar atır, sahibkarlarla mütəmadi görüşlər keçirir və Dövlət Proqramının rayon üzrə müəyyənləşdirilmiş tədbirlərini icra edir.
Prezident Administrasiyasının Ərazi-təşkilat məsələləri şöbəsinin 5-ci ərazi sektorunun müdiri Dəyanət Abdullayev çıxışında Dövlət Proqramının ölkənin aqrar potensialından maksimum səmərəli istifadəni və qlobal çağırışlara cavab verməyi hədəfləyən genişhəcmli fəaliyyət planı olduğunu bildirib.
Onun sözlərinə görə, dövlət başçısı tərəfindən müəyyənləşdirilmiş prioritet istiqamətlər və yeni Dövlət Proqramı kənd təsərrüfatının müasir standartlara uyğun inkişafını, innovativ yanaşmaların tətbiqini və kənd yerlərində məşğulluğun genişləndirilməsini nəzərdə tutur.
Bu strateji hədəflər aqrar ənənələrinə və böyük istehsal potensialına malik Biləsuvar rayonunda kənd təsərrüfatının rəqabət qabiliyyətinin daha da yüksəldilməsini, aqrar sahibkarlığın genişləndirilməsini və istehsalın keyfiyyətcə yeni mərhələyə keçməsini zəruri edir.
Kənd Təsərrüfatı Nazirliyinin Bitkiçiliyin təşkili və monitorinqi şöbəsinin müdiri Pərviz Yusifov bildirib ki, 2026–2030-cu illəri əhatə edən Dövlət Proqramının əsas məqsədi kənd təsərrüfatı və sahibkarlığa yönələn dövlət dəstəyinin gücləndirilməsidir.
Onun sözlərinə görə, subsidiyaların, güzəştli kreditlərin və digər maliyyə mexanizmlərinin genişləndirilməsi fermerlərin fəaliyyətinə mühüm töhfə verəcək. Dövlət dəstəyi regionların iqtisadi potensialını aktivləşdirməklə yanaşı, istehsalın artırılmasına, yeni iş yerlərinin açılmasına və müasir texnologiyaların tətbiqinə şərait yaradacaq.
Yusifov bildirib ki, əsas hədəf bu mexanizmlərdən səmərəli istifadə etməklə ölkədə dayanıqlı iqtisadi inkişafı və biznes mühitini daha da möhkəmləndirməkdir.
Görüşdə çıxış edən fermer və sahibkarlar Dövlət Proqramının icrası ilə bağlı nəzərdə tutulan tədbirlərin uğurla reallaşdırılması üçün bütün potensiallarını səfərbər edəcəklərini vurğulayaraq, qarşılaşdıqları bəzi problemləri diqqətə çatdırıblar.
Sahibkarlar Proqramın icrası çərçivəsində onlara göstərilən dövlət dəstəyinə görə Prezident İlham Əliyevə minnətdarlıqlarını bildiriblər. Qarşılıqlı müzakirə formatında davam edən görüşdə iştirakçıların sualları ətraflı cavablandırılıb, müraciət və təklifləri dinlənilib.
