bp şirkətinin nümayəndəsi bildirib ki, şirkət Azərbaycanda əldə etdiyi təcrübədən Özbəkistan və Qazaxıstan daxil olmaqla daha geniş regionda yeni imkanların həyata keçirilməsi üçün istifadə etməyi planlaşdırır.
Bu barədə "BP America" şirkətinin beynəlxalq əlaqələr şöbəsinin rəhbəri Kimberli Harrinqton Nyu-Yorkda "Caspian Policy Center" (CPC) təşkilatının keçirdiyi yeddinci illik Xəzər biznes forumunda danışıb.
Onun sözlərinə görə, bp-nin Azərbaycandakı layihələri xüsusi diqqət çəkir, çünki bu layihələr ölkənin son 30 il ərzində topladığı təcrübəyə, biliyə və imkanlara söykənir. Harrinqton əlavə edib ki, Xəzər regionunun enerji sektorundakı inkişaf hökumətlər, biznes dairələri və yerli icmalar arasında uzunmüddətli əməkdaşlığın nümunəsi kimi qiymətləndirilir.
Harrinqton bu fikri "Orta Dəhliz boyu yeni nəsil biznes: energetika, nəqliyyat əlçatanlığı və kritik əhəmiyyətli faydalı qazıntılar" adlı panel müzakirəsində səsləndirib:
"bp üçün Xəzər regionu dövrümüzün energetika sahəsində ən təsirli uğur hekayələrindən biridir. Bu, ortaq uzunmüddətli məqsədə çatmaq üçün özəl sektorun, hökumətlərin və icmaların birgə işi sayəsində mümkün olub"
"McLarty Associates" şirkətinin strategiya şöbəsinin rəhbəri və Avrasiya üzrə baş idarəedici direktoru Kler Kayzer çıxışında Orta Dəhlizin inkişafında razılaşma proseslərinin və rəqəmsallaşmanın rolunun artdığını vurğulayıb. O, Bakı-Tbilisi-Ceyhan neft kəməri layihəsini xatırladaraq bildirib ki, bu miqyaslı regional layihələr tarixən əvvəlcə siyasi dəstək, sonra isə investisiya tələb edib.
"Apollo Global Management" şirkətinin strukturlaşdırılmış maliyyələşdirmə üzrə qlobal bölməsinin rəhbəri Cəmşid Ehsani Azərbaycan Respublikasının Dövlət Neft Şirkəti (SOCAR) ilə "Apollo"nun strateji əməkdaşlığının inkişaf etdiyini bildirib. Onun sözlərinə görə, hazırda Azərbaycanda və xarici ölkələrdə iri enerji layihələrinin maliyyələşdirilməsi istiqamətində danışıqlar aparılır.
"Kazakh Invest" təşkilatının ABŞ-dəki nümayəndəliyinin rəhbəri Marat Birimjan Qazaxıstanın Orta Dəhlizin inkişafındakı rolunun güclənməsindən, eləcə də kritik əhəmiyyətli mineralların hasilatı, emalı, daşınması və digər sahələrdə investisiya imkanlarının genişlənməsindən danışıb.
"Son yeddi il ərzində daşımaların, yəni Orta Dəhlizlə konteyner daşımalarının həcmi beş dəfə artıb və gələcəkdə bu göstərici daha da artacaq"
Birimjan Qazaxıstan və ABŞ arasında ticarət-iqtisadi əlaqələrin də genişləndiyini diqqətə çatdıraraq bildirib ki, ötən ilin sonunda iki ölkənin şirkətləri istehsal, aqrobiznes, neft-kimya, kritik əhəmiyyətli minerallar, nəqliyyat və logistika sahələrində ümumi dəyəri 17 milyard ABŞ dolları olan sazişlər imzalayıb. O əlavə edib ki, əlavə investisiyaların cəlb olunması üçün layihələr beynəlxalq maliyyə mənbələri üçün daha əlçatan olmalıdır.
