Prezident İlham Əliyev bildirib ki, Azərbaycan Cənubi Qafqazda yerləşsə də, Mərkəzi Asiya regionunda tamhüquqlu üzv statusu qazanıb.
Dövlət başçısı İlham Əliyev II Azərbaycan Beynəlxalq İnvestisiya Forumunda çıxış edərək ölkənin regional mövqeyi barədə danışıb. Onun sözlərinə görə, Azərbaycan coğrafi cəhətdən Cənubi Qafqazda yerləşsə də, Mərkəzi Asiya məkanında tam hüquqlu iştirakçıya çevrilib.
Prezident qeyd edib ki, ölkədə idarəetmə sistemi, nəqliyyatın rəqəmsallaşdırılması və gömrük prosedurları investorlar üçün aydın və şəffaf qaydalara əsaslanır. Onun fikrincə, məhz bu amillər Azərbaycanın potensialını daha da gücləndirir.
Dövlət başçısı regiondakı geosiyasi şəraitin dəyişkənliyinə də toxunub və bunun ölkənin cəlbediciliyinə təsir etməyəcəyini vurğulayıb.
“Bizim regionda geosiyasi vəziyyət dəyişsə, 5 il əvvəlki vəziyyətə qayıtsa, biz yenə də təchizatçılar üçün çox cəlbedici olacağıq”, - deyə Prezident qeyd edib.
İlham Əliyev əlavə edib ki, mövcud tənzimləyici çərçivə və infrastruktur şəraiti hər hansı xarici təsirdən asılı olmayaraq Azərbaycanın iqtisadi tərəfdaşlıq üçün əlverişli məkan olaraq qalmasını təmin edir.
