Yeni Azərbaycan Partiyasının (YAP) Yasamal rayon təşkilatının XII konfransı keçirilib, tədbirdə son beş ilin fəaliyyəti barədə hesabat dinlənilib.
Yeni Azərbaycan Partiyasının Yasamal rayon təşkilatı növbəti, XII konfransını keçirib. Toplantıda təşkilatın beş illik dövr ərzindəki fəaliyyəti barədə hesabat təqdim olunub, görülən işlər və qarşıda duran vəzifələr geniş şəkildə müzakirə edilib.
Tədbirdə çıxış edən YAP Yasamal rayon təşkilatının sədri Bəxtiyar Nəbiyev partiyanın tarixi inkişaf mərhələlərinə və onun ölkənin ictimai-siyasi həyatındakı roluna toxunub. O bildirib ki, 1992-ci ildə Ulu Öndər Heydər Əliyevin təşəbbüsü ilə əsası qoyulan YAP illər ərzində ciddi inkişaf yolu keçərək bu gün 700 mindən artıq üzvü özündə cəmləşdirən ölkənin ən nəhəng siyasi qurumuna çevrilib.
Bəxtiyar Nəbiyevin sözlərinə görə, YAP Yasamal rayon təşkilatı da fəaliyyətə başladığı ilk gündən partiyanın strateji hədəflərinin gerçəkləşdirilməsinə töhfə verib. 20 fevral 1993-cü ildə işə başlayan bu təşkilat hazırkı vəziyyətdə 103 ərazi partiya vahidini və 33 mindən çox üzvü əhatə edir.
Sədr həmçinin qeyd edib ki, hesabat dövründə təşkilatın işi əhəmiyyətli dərəcədə genişləndirilib, partiya üzvləri müxtəlif ictimai-siyasi və sosial tədbirlərdə fəallıqla təmsil olunublar. Ona görə, son illər ərzində rayon təşkilatı ilə yerli ictimai qurumlar və dövlət orqanları arasındakı əməkdaşlıq da daha da möhkəmlənib.
Yasamal Rayon İcra Hakimiyyətinin başçısı Elşad Həsənov öz çıxışında Ulu Öndər Heydər Əliyevin Yeni Azərbaycan Partiyasının qurulmasındakı tarixi rolundan söz açıb. O, Heydər Əliyevin vaxtilə söylədiyi bir fikri xatırladıb:
Yeni Azərbaycan Partiyası dünənin, bu günün və sabahın partiyasıdır
Elşad Həsənov vurğulayıb ki, bu fikrin səslənməsindən təxminən 30 il keçsə də, onun daşıdığı siyasi uzaqgörənlik bu gün öz təsdiqini tapmaqdadır. O, YAP-ın Azərbaycanın ən mürəkkəb və taleyüklü anında xalqın israrlı tələbi ilə yarandığını bildirib və Heydər Əliyevin müəyyənləşdirdiyi inkişaf strategiyasının bu gün Prezident İlham Əliyev tərəfindən uğurla davam etdirildiyini diqqətə çatdırıb.
Yasamal RİH başçısı rayon icra hakimiyyəti ilə partiya təşkilatı arasındakı əməkdaşlığın önəmindən bəhs edərək bildirib ki, 2025-ci ildə bu iki qurumun birgə təşəbbüsü ilə 56 tədbir təşkil olunub. O, bu əməkdaşlığın gələcəkdə də davam etdirilməsinin zəruriliyini vurğulayıb.
Elşad Həsənov həmçinin qeyd edib ki, bu gün Yeni Azərbaycan Partiyası qalib Azərbaycanın partiyası kimi tanınır və Müzəffər Ali Baş Komandan İlham Əliyevin rəhbərliyi altında qazanılan tarixi Zəfər ölkənin milli maraqlarına söykənən siyasətinin mühüm bəhrələrindən biri hesab olunur. O, YAP Yasamal rayon təşkilatının bundan sonra da partiya prinsiplərinə sadiq qalaraq dövlətin inkişafına və cəmiyyətin rifahına xidmət edəcəyinə əminliyini bildirib.
Konfransın davamında YAP rəhbərliyinin nümayəndələri və digər natiqlər çıxış edərək hesabat dövründəki fəaliyyətin əhəmiyyətindən, partiya təşkilatlarının işinin gücləndirilməsi zərurətindən və qarşıda duran vəzifələrdən danışıblar.
Tədbirin sonunda YAP Yasamal rayon təşkilatının fəaliyyətinin təkmilləşdirilməsi, üzvlərin ictimai-siyasi fəallığının artırılması və növbəti dövr üçün nəzərdə tutulan vəzifələrin icrası ilə bağlı müvafiq qərarlar qəbul edilib.
