Şamaxı rayonunda kənd təsərrüfatı sahəsində 2026-2030-cu illəri əhatə edən Dövlət Proqramının icrası ilə bağlı fermer və sahibkarlarla görüşlər keçirilib.
Şamaxı rayonunda "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı"nın icrası istiqamətində görülən işlər yerində araşdırılıb. Bu məqsədlə rayonda fəaliyyət göstərən sahibkar və fermer təsərrüfatlarına baş çəkilib.
Tədbirdə Şamaxı Rayon İcra Hakimiyyətinin başçısı Tahir Məmmədov, Azərbaycan Prezidenti Administrasiyasının Ərazi-təşkilat məsələləri şöbəsinin 6-cı ərazi sektorunun müdiri Ağa-Əli Əhmədov, Kənd Təsərrüfatı Nazirliyi yanında Aqrar Xidmətlər Agentliyinin sədr müavini Taleh Zeynalov və aidiyyəti dövlət qurumlarının nümayəndələri iştirak edib.
Nümayəndə heyəti Heydər Rahib Paşa oğlunun, Qasımov Əyyub Qarakişi oğlunun, Şıxıyev Hacıbaba Hacıbala oğlunun təsərrüfatlarında, həmçinin "Şirvan Aqro" MMC-də görülən işlərlə tanış olub. Sahibkarlar mövcud vəziyyət, əldə edilən nəticələr və qarşıda duran vəzifələr barədə məlumat verib.
Görüşlər zamanı əkin sahələrindən daha səmərəli istifadə, məhsuldarlığın yüksəldilməsi, müasir aqrotexnologiyaların tətbiqi və su təminatının yaxşılaşdırılması ilə bağlı fikir mübadiləsi aparılıb. Bundan başqa, istehsal imkanlarının genişləndirilməsi və kənd təsərrüfatının müxtəlif sahələrinin inkişafı müzakirə mövzusu olub.
Fermer və sahibkarların qarşılaşdığı çətinliklər, eləcə də onların gələcəyə dair planları da dinlənilib. Bildirilib ki, kənd təsərrüfatının inkişafı rayonun iqtisadi potensialının səmərəli reallaşdırılması, əhalinin işlə təminatının artırılması və yerli istehsalın genişləndirilməsi baxımından böyük önəm daşıyır.
Tahir Məmmədov çıxışında bildirib ki, 2026-2030-cu illəri əhatə edən Dövlət Proqramı aqrar sektorun gələcək inkişafı üçün mühüm istiqamətverici sənəddir. Onun sözlərinə görə, proqram mövcud potensialın tam işə salınması, istehsal həcminin və məhsuldarlığın artırılması, texnoloji yeniliklərin tətbiqi və fermerlərin imkanlarının gücləndirilməsi baxımından xüsusi əhəmiyyət kəsb edir.
Ağa-Əli Əhmədov çıxışında qeyd edib ki, aqrar sahənin inkişafı təkcə istehsal göstəricilərinin yüksəldilməsi ilə bitmir. Onun sözlərinə görə, torpaq və su ehtiyatlarından düzgün istifadə, texnologiyaların tətbiqi, məhsulun keyfiyyətinin artırılması və fermerlərin peşəkarlıq səviyyəsinin yüksəldilməsi də prioritet sahələr sırasındadır.
Görüş iştirakçıları həmçinin sahibkar və fermerlərin təşəbbüslərinin dəstəklənməsinin, onların üzləşdiyi problemlərin müvafiq qurumlarla birgə həll olunmasının vacibliyini vurğulayıblar. Bildirilib ki, rayonun aqrar potensialından daha effektiv yararlanmaqla istehsal gücünün artırılması və yeni layihələrin reallaşdırılması istiqamətində iş davam etdiriləcək.
Görüşün sonunda Dövlət Proqramı çərçivəsində qarşıda duran tapşırıqlar, işlərin əlaqələndirilməsi və aqrar sahədə mövcud resurslardan daha səmərəli istifadə olunması mövzusunda fikir mübadiləsi aparılıb.
