Azərbaycanda Yaxın Şərqin çoxəsrlik mədəni, tarixi və ədəbi irsinə həsr olunmuş ArabAZ (“Ən yaxın Şərq”) adlı yeni media platforması istifadəyə verilib. Layihənin təsisçisi və rəhbəri jurnalist-analitik Rufiz Hafizoğludur.
Azərbaycanın media məkanında yeni bir istiqamətin təməlini qoymaq iddiasında olan ArabAZ layihəsi rəsmən fəaliyyətə başlayıb. Platforma Yaxın Şərq regionunun tarixi, bədii və mədəni zənginliyini oxuculara sistemli şəkildə çatdırmağı qarşısına məqsəd qoyub.
Resursun arxasında duran şəxs — regionun geosiyasəti, ictimai həyatı və mədəni dinamikası mövzusunda uzun illərdir araşdırmalar aparan tanınmış jurnalist Rufiz Hafizoğludur. Onun sözlərinə görə, layihənin başlıca niyyəti Şərqi yalnız siyasi gərginliklər və mübahisələr üzərindən deyil, onun fəlsəfi dərinliyi, klassik və çağdaş ədəbiyyatı, sənət mühiti fonunda təqdim etməkdir.
ArabAZ-ın yaradılmasında əsas hədəf Azərbaycan oxucusu ilə Şərq mədəniyyəti arasındakı tarixi-mənəvi bağları canlandırmaq, iki coğrafiyanın ədəbi-fəlsəfi baxışlarını müasir jurnalistika prinsipləri əsasında bir araya gətirməkdir. Platforma səthi və şablon xəbər formatından uzaqlaşaraq, dərin araşdırmaya söykənən analitik yazılar və elmi-kütləvi esselərə üstünlük verəcək.
Yeni resursda ərəb və Şərq dünyasının müxtəlif mədəni qatlarını əhatə edən bir sıra rubrikalar yaradılıb:
Rufiz Hafizoğlunun bildirdiyinə görə, ArabAZ sadəcə gündəlik xəbər saytı deyil, həm də intellektual müzakirə platforması və region üzrə etibarlı bir mənbə kimi formalaşdırılacaq.
Portalda yerləşdirilən bütün materiallar Azərbaycan dilinin qrammatik və leksik normalarına ciddi riayət edilməklə hazırlanır. Müasir dizayn və rahat oxunaqlı tərtibatla təqdim olunan sayt artıq geniş auditoriyanın istifadəsinə verilib. Gələcəkdə saytın ərəb dilində versiyasının da istifadəyə veriləcəyi planlaşdırılır.
