Ermənistan Baş naziri Nikol Paşinyan ABŞ-də keçirilən "Konkordiya" sammitindəki çıxışında TRIPP layihəsinin ölkə iqtisadiyyatı üçün yeni mərhələ başlatacağını bildirib.
Ermənistan Baş naziri Nikol Paşinyan ABŞ-də təşkil olunan illik "Konkordiya" sammitində çıxış edərək TRIPP layihəsinin işə düşməsi ilə ölkəsi və onun iqtisadiyyatı üçün yeni bir dövrün başlanacağını açıqlayıb.
Baş nazir bildirib ki, hazırda hökumətin əsas diqqəti məhz bu layihənin reallaşdırılmasına yönəlib və bunun sayəsində bölgədə qarşılıqlı iqtisadi əlaqələrin tam bərpa olunacağını gözləyir.
"Hazırda diqqəti TRIPP layihəsinin həyata keçirilməsinə yönəltmişik, bunun nəticəsində regional qarşılıqlı əlaqələr tam şəkildə təmin olunacaq. TRIPP ölkəmiz və iqtisadiyyatımız üçün yeni dövr açacaq, çünki hər şeydən əvvəl Azərbaycanla dəmir yolu əlaqəmiz yaranacaq", - deyə Paşinyan qeyd edib.
Paşinyan həmçinin Ermənistanın Türkiyə ilə sərhədinin, bunun tərkib hissəsi olaraq isə iki ölkə arasında dəmir yolu əlaqəsinin açılmasını böyük həvəslə gözlədiyini vurğulayıb.
