Rusiyanın Xakasiya Respublikasına aid Abaza şəhərinə bir gecədə çoxlu sayda ayı daxil olub, yerli hakimiyyət hadisəni təsdiqləyib.
Rusiyanın Xakasiya Respublikasında yerləşən Abaza şəhəri vəhşi ayıların hücumuna məruz qalıb. Gecə saatlarında yırtıcı heyvanlar şəhərin müxtəlif istiqamətlərindən ərazidə görünüblər.
Xakasiya rəhbərinin müavini Dmitri Buçenik hadisəni özünün "Max" adlı kanalında açıqlayıb. Onun sözlərinə görə, gecə ərzində heyvanların şəhərə kütləvi şəkildə daxil olması faktları qeydə alınıb.
Buçenik ayıların bir neçəsinin ovçular tərəfindən vurulduğunu, bir neçəsinin isə ərazidən uzaqlaşdırıldığını bildirib.
Son aylar ərzində Rusiyanın ayrı-ayrı bölgələrində vəhşi heyvan hücumlarının sayında ciddi artım müşahidə olunur. Statistikaya görə, bu müddətdə ölkə daxilində ayı hücumları nəticəsində həlak olanların ümumi sayı 15 nəfərə yüksəlib.
Ən çox aktivlik Sibir və Uzaq Şərq bölgələrində, o cümlədən Krasnoyarsk diyarında qeydə alınıb. Mütəxəssislər bunu yalnız bir bölgəyə aid problem kimi qiymətləndirmirlər, çünki fakt geniş ərazini əhatə edir.
Ekspertlərin fikrincə, heyvanların insan məskunlaşdığı ərazilərə yaxınlaşmasının bir neçə səbəbi var. Krasnoyarsk diyarında baş vermiş meşə yanğınları ayıların təbii yaşam mühitinə ciddi zərər vurub.
Bundan əlavə, payız fəslində ayıların qidalanmasında əsas kalori mənbəyi sayılan sidr qozasının bu il azlığı da vəziyyəti ağırlaşdırıb. Nəticədə, qida çatışmazlığı yaşayan heyvanlar yaşayış məntəqələrinə doğru hərəkət etməyə başlayıb.
