Elm və Təhsil Nazirliyi ilə "OpenAI" şirkəti arasında təhsil sahəsində süni intellekt texnologiyalarının tətbiqini genişləndirən üçillik Anlaşma Memorandumu imzalanıb.
Sənəd Nyu-Yorkda elm və təhsil naziri Emin Əmrullayev ilə "OpenAI" şirkətinin təhsil üzrə vitse-prezidenti Leah Belsky tərəfindən imzalanıb. Bu, tərəflər arasında bağlanan ikinci Anlaşma Memorandumudur.
İlk əməkdaşlıq çərçivəsində adaptiv öyrənmə platformasının hazırlanması işi görülmüşdü. Yeni sazişlə bu istiqamətdə əməkdaşlıq daha geniş formata keçir.
Yeni sazişin əsas məqsədi süni intellekt vasitəsilə müəllim və şagirdlər üçün tədris imkanlarını təkmilləşdirmək, təhsil prosesini daha səmərəli və əlçatan etməkdir. Bununla yanaşı, təhsil müəssisələrində süni intellektdən təhlükəsiz və məsuliyyətli istifadəyə dair yanaşmaların formalaşdırılması nəzərdə tutulur.
Əməkdaşlıq çərçivəsində süni intellekt əsaslı tədris vasitələrinin yaradılması planlaşdırılır. Eyni zamanda müəllim və digər təhsil işçiləri üçün yeni texnologiyalardan səmərəli istifadəyə dair təlimlər keçiriləcək. Məktəblərdə süni intellektin təhlükəsiz tətbiqi üzrə standart və metodiki yanaşmaların hazırlanması da bu işin bir hissəsidir.
Əməkdaşlığın mühüm istiqamətlərindən biri riyaziyyat, təbiət elmləri və oxu fənləri üzrə təhsilin idarəolunması sisteminin "OpenAI" texnologiyaları vasitəsilə təkmilləşdirilməsidir. Yaradılacaq yeni imkanlar müəllimlərə dərs hazırlığında, tədris materiallarının formalaşdırılmasında və şagirdlərin qiymətləndirilməsində süni intellekt dəstəyi göstərəcək.
Bu addımın məqsədi müəllimlərin inzibati işlərə və hazırlığa sərf etdiyi vaxtı azaltmaqdır. Nəticədə pedaqoqların şagirdlərlə birbaşa işə daha çox vaxt ayıra bilməsi hədəflənir.
Sazişə əsasən müəllimlər, tələbələr və təhsil müəssisələrinin əməkdaşları üçün süni intellekt üzrə müxtəlif təlim proqramları həyata keçiriləcək. "Təlimçilərin təlimi" adlı proqram vasitəsilə ölkədə süni intellekt üzrə yerli mütəxəssis və təlimçi potensialının gücləndirilməsi nəzərdə tutulur.
Tərəflər bundan başqa təhsildə süni intellektdən etik, təhlükəsiz və məsuliyyətli istifadəyə dair metodiki yanaşmalar, tövsiyələr və çərçivə sənədlərinin hazırlanması istiqamətində də birgə fəaliyyət göstərəcəklər.
