İsveçin qlobal moda brendi H&M Azərbaycandakı ilk mağazasını oktyabrın 17-də saat 12:00-da “Gənclik Mall”da açacağını rəsmi olaraq bildirib.
İsveçin qlobal moda brendi H&M Azərbaycandakı ilk mağazasını oktyabrın 17-də saat 12:00-da “Gənclik Mall”da açacağını təsdiqləyib. Bu addım brendin Sinteks Şirkətlər Qrupu ilə françayzinq tərəfdaşlığı çərçivəsində Azərbaycan bazarına giriş planının davamı sayılır.
İki mərtəbəni əhatə edən mağazanın ümumi sahəsi 2 153 kvadratmetr təşkil edir. Məkan iki ayrı müştəri girişinə malikdir və ziyarətçiləri mövsümün əsas qarderob elementləri ilə aktual moda tendensiyalarını özündə birləşdirən geniş alış-veriş sahəsi qarşılayacaq.
Mağazada H&M-in əsas moda xətləri bir araya gətirilib. Qadınlar üçün “Ladies” və “Divided” konseptləri, eləcə də kişi və uşaq geyimləri təklif olunacaq.
Bundan başqa, idman geyimlərini rahatlıq və funksionallıqla birləşdirən “H&M Move” xətti də çeşidə daxil ediləcək. Mağazada müştərilər üçün daim yenilənən geniş çeşid təqdim olunacaq və bu çeşid keyfiyyət, üslub və əlçatan qiymət prinsiplərinə əsaslanacaq.
H&M-in Françayzinq üzrə rəhbəri Linn Hoffström yeni bazara girişlə bağlı fikirlərini bölüşüb:
“H&M-i Azərbaycana gətirməkdən və qlobal genişlənmə yolumuzda bu həyəcanverici addımı atmaqdan məmnunuq. Azərbaycan dinamik və inkişaf edən bazardır və burada uzunmüddətli mövcudluq yaratmaq üçün böyük potensial görürük. Etibarlı tərəfdaşımız Sinteks ilə birlikdə H&M-in moda və keyfiyyətini ölkə üzrə müştərilərə ən sərfəli qiymətə təqdim etməyi və modanı hər kəs üçün əlçatan etmək məqsədilə ruhlandırıcı alış-veriş təcrübələri yaratmağı səbirsizliklə gözləyirik”
Mağazanın “Gənclik Mall”da yerləşdirilməsi təsadüfi seçilməyib. Ticarət mərkəzinin əlçatanlığı, zəngin moda, qida və əyləncə seqmentlərini özündə birləşdirməsi bu yeri H&M üçün əlverişli edib.
H&M Azərbaycanın icraçı direktoru Pyotr Kuxarski açılışın əhəmiyyəti barədə deyib:
“H&M-in Azərbaycandakı ilk mağazasının açılışı bizim üçün mühüm mərhələdir və brendi Bakıdakı müştərilərə daha da yaxınlaşdırmaqdan qürur duyuruq. Komandamız hər kəsi “Gənclik Mall”da qarşılamağı, ruhlandırıcı moda və mükəmməl alış-veriş təcrübəsi vasitəsilə müştərilərimizlə güclü və uzunmüddətli əlaqə qurmağı səbirsizliklə gözləyir”
Bakılılar oktyabrın 17-də saat 12:00-da “Gənclik Mall”da keçiriləcək açılış tədbirinə dəvət olunub. Saat 12:00-da lentkəsmə mərasimi baş tutacaq və bu anı qaçırmamaq tövsiyə olunur. Növbəyə ilk qoşulan 100 qonağa H&M tərəfindən xüsusi hədiyyə təqdim ediləcək.
“Hennes & Mauritz” AB (PUBL) adı ilə tanınan H&M 1947-ci ildə İsveçdə yaradılıb və “Nasdaq Stockholm” fond birjasında qeydiyyatdadır. Qrupun tərkibinə H&M (o cümlədən “H&M Home”, “H&M Move” və “H&M Beauty”), COS, “Weekday” (“Cheap Monday” və “Monki” daxil), “&Other Stories”, “ARKET”, “Singular Society” və “Sellpy” brendləri daxildir.
1996-cı ildə təsis edilən Sinteks Şirkətlər Qrupu Qafqaz və Mərkəzi Asiya regionunda fəaliyyət göstərən moda və həyat tərzi pərakəndə satış qrupudur. Qrup 100-dən çox beynəlxalq brendi təmsil edir və univermaqlar, butiklər, konsept mağazalar, eləcə də elektron ticarət platformaları daxil olmaqla 120-dən çox satış nöqtəsini idarə edir. Təxminən 1 700 nəfərlik komandaya malik Sinteks-in portfeli moda, aksesuar, ayaqqabı, gözəllik, zərgərlik, ev dekorasiyası, qida və içki sahələrini əhatə edir.
