Fransanın tanınmış aktrisası, müğənni və yazıçısı Marina Vladi 88 yaşında vəfat edib. Bu barədə onun ailəsi AFP agentliyinə məlumat verib.
Fransanın tanınmış aktrisası, müğənni və yazıçısı Marina Vladi 88 yaşında dünyasını dəyişib. Onun ailəsi bu barədə AFP agentliyinə açıqlama verib.
Məlumata görə, sənətçi ötən gün öz evində, yaxınları və heyvanlarının əhatəsində həyata gözlərini yumub. Övladları onun ömür yolunu belə səciyyələndirib:
uzun, gözəl və dolğun
Əsl adı Yekaterina-Marina Polyakova-Baydarova olan sənətçi 1938-ci il mayın 10-da Fransanın Klişi şəhərində rus mühacir ailəsində dünyaya göz açıb. O, kinoya cəmi 16 yaşında qədəm qoyub.
1954-cü ildə Andre Kayattın çəkdiyi "Daşqından əvvəl" ("Avant le déluge") filmindəki roluna görə ən perspektivli gənc aktrisaya verilən Syuzan Byanşetti mükafatına layiq görülüb. Sonrakı illərdə onun uğurları davam edib — 1963-cü ildə "Nikah yatağı" ("Le Lit conjugal") filmindəki oyununa görə Kann Film Festivalında ən yaxşı aktrisa mükafatını qazanıb.
Aktrisanın karyerası ərzində 80-dən artıq filmdə rol aldığı bildirilir. Bundan əlavə, 1970-ci illərdə bir sıra populyar komediya filmlərində də çəkilib.
Marina Vladi sənət həyatını yalnız kino ilə məhdudlaşdırmayıb — musiqi və ədəbiyyat sahələrində də özünü sınayıb. Bacıları ilə birgə "Polyakoff bacıları" ("Les Sœurs Poliakoff") adlı iki albom hazırlayıb, ümumilikdə isə 10-a yaxın kitabın müəllifi olub.
Onun kitabları arasında 1987-ci ildə çap olunan və rusiyalı şair Vladimir Vısotski ilə münasibətlərindən danışan "Vladimir ou le vol arrêté" ("Vladimir və ya dayandırılmış uçuş") əsəri xüsusi yer tutur.
Marina Vladi 1969-cu ildə Vladimir Vısotski ilə ailə qurub. Cütlük Moskvada yaşayıb və aktrisa şairin 1980-ci ildə vəfat etməsinə qədər onun yanında olub.
