Türkiyədə hazırlanan yeni qanun layihəsinə əsasən, 2015-ci ildən sonra dünyaya gələn şəxslərə siqaret çəkmək ömürlük qadağan olunacaq.
Türkiyədə tütün məhsulları ilə mübarizə məqsədilə hazırlanan qanun layihəsi 2015-ci ildən sonra doğulan vətəndaşlara siqaretin ömürlük qadağan edilməsini nəzərdə tutur.
Layihənin hazırlanmasında iştirak edən professor Toker Ergüder Anadolu Agentliyinə açıqlama verərək bu barədə məlumat yayıb. O bildirib ki, qanunla yanaşı, ölkədə nazik, yəni “slim” siqaretlərin satışının da tamamilə dayandırılması təklif olunur.
Ergüder son illərdə Türkiyədə siqaret satışının xeyli artdığını diqqətə çatdırıb. Onun sözlərinə görə, 2012-ci ildə ölkədə təxminən 91 min ton, yəni 4,5 milyard paket siqaret satılıbsa, bu rəqəm 2025-ci ilə qədər təxminən 160 min tona, başqa sözlə 8 milyard paketə yüksəlib.
Daha əvvəl bildirilmişdi ki, Ədalət və İnkişaf Partiyası (AKP) tütünlə mübarizəyə həsr olunmuş qanun layihəsini Böyük Millət Məclisinə təqdim edəcək. Sənədin əsas hədəfi 2040-cı il yanvarın 1-dən etibarən tütün məhsullarının ölkə bazarından tamamilə çıxarılmasıdır.
