“Tottenhem” klubu stadionunun yaxınlığında depressiya ilə mübarizə üçün xüsusi skamya yerləşdirib. Bu addım 2020-ci ildə intihar edən azarkeşin xatirəsinə həsr olunub.
London klubu “Tottenhem” öz stadionunun qarşısında insanların psixoloji vəziyyətinə diqqət çəkmək məqsədilə yeni bir təşəbbüs həyata keçirib. Klubun ərazisində quraşdırılan skamya depressiya ilə mübarizəyə dəstək kimi düşünülüb. Bu barədə məlumat London klubunun rəsmi internet səhifəsində yayılıb.
Qurulan skamya təsadüfi seçilməyib – o, 2020-ci ildə həyatına son qoyan “Tottenhem” azarkeşinin xatirəsini yaşatmaq üçün nəzərdə tutulub. Klubun məqsədi özünü pis hiss edən insanlara dəstək mühiti yaratmaqdır.
Layihəyə görə, ruh düşkünlüyü yaşayan şəxslər həmin skamyada oturaraq öz hisslərini bölüşə biləcəkləri həmsöhbət tapa biləcəklər. Beləliklə, tək qalmaq əvəzinə insanlar dəstək ala biləcəklər.
Bununla yanaşı, “Tottenhem” psixoloji yardıma ehtiyacı olanlar üçün ödənişsiz məsləhət xətti də istifadəyə verib. Bu xidmət klubun sosial məsuliyyət siyasətinin bir hissəsi kimi təqdim olunub.
Sosial layihəyə paralel olaraq, komandanın idman göstəriciləri o qədər də ürəkaçan deyil. İngiltərə Premyer Liqasının ilk 5 turundan sonra “Tottenhem” cəmi 2 xalla turnir cədvəlinin son – 20-ci pilləsindədir.
Komanda mövsümün əvvəlindən bəri hələ bir dəfə də qələbə əldə edə bilməyib və bu müddətdə cəmi 2 qol vurub. Zəif nəticələrə baxmayaraq, klub yay transfer dövründə yeni oyunçuların alınmasına 366,35 milyon avro xərcləyib.
