Azərbaycan Baş naziri Əli Əsədov sentyabrın 25-də Bakıda Tacikistan Baş naziri Koxir Rasulzoda ilə görüşüb. Görüş Tacikistan rəhbərinin Azərbaycana rəsmi səfəri çərçivəsində baş tutub.
Azərbaycan Baş naziri Əli Əsədov sentyabrın 25-də özünün dəvəti ilə ölkəyə rəsmi səfərə gələn Tacikistan Baş naziri Koxir Rasulzoda ilə görüşüb. Tərəflər görüş zamanı iki ölkə arasında dostluq və qarşılıqlı hörmətə söykənən münasibətlərin uğurla irəlilədiyini qeyd ediblər.
Bildirilib ki, 2024-cü ildə imzalanmış Strateji tərəfdaşlıq haqqında Bəyannamə ikitərəfli əlaqələrin inkişafında mühüm mərhələ olub. Prezidentlər İlham Əliyevin və Emoməli Rəhmonun siyasi iradəsi və göstərdikləri birgə səylər Azərbaycan-Tacikistan münasibətlərinin bugünkü yüksək səviyyəsinə çatmasında əsas rol oynayıb.
Görüşdə iki ölkənin regional və beynəlxalq təşkilatlar çərçivəsində bir-birinə göstərdiyi dəstək yüksək dəyərləndirilib. Bundan əlavə, qarşılıqlı ticarət dövriyyəsindəki müsbət meyillər məmnunluqla qarşılanıb, lakin ticarət-iqtisadi əməkdaşlığın hələ də genişlənmə potensialının olduğu vurğulanıb.
Tərəflər Hökumətlərarası Birgə Komissiyanın, həmçinin Azərbaycan-Tacikistan İşgüzar Şurasının və biznes-forum formatının işgüzar dairələr arasında birbaşa əlaqələrin qurulmasında və yeni birgə layihələrin həyata keçirilməsindəki rolunu önə çəkiblər.
Nəqliyyat-tranzit sektorunda mövcud əməkdaşlıq imkanlarının daha səmərəli istifadəsi məsələləri də müzakirə olunub. Bu kontekstdə Orta Dəhlizin Asiya ilə Avropa arasında getdikcə önəm qazanan marşrutlardan biri kimi rolu, eləcə də Zəngəzur dəhlizinin regionun yeni nəqliyyat sisteminə qatdığı əlavə imkanlar qeyd edilib.
Energetika, xüsusən bərpa olunan enerji mənbələri sahəsində qarşılıqlı faydalı əməkdaşlıq üçün yaxşı perspektivlərin mövcudluğu bildirilib. Bundan başqa, dövlət xidmətlərinin göstərilməsi sahəsində əməkdaşlıq imkanları barədə fikir mübadiləsi aparılıb.
Tərəflər mədəni-humanitar və təhsil sahələrindəki əlaqələrin inkişafından məmnunluqlarını ifadə ediblər. Qeyd olunub ki, illik təhsil kvotalarının qarşılıqlı ayrılmasına dair imzalanmış Saziş tələbələr üçün əlavə imkanlar yaradıb.
Görüşün sonunda Əli Əsədov və Koxir Rasulzoda Azərbaycan ilə Tacikistan arasındakı strateji tərəfdaşlığın bütün sahələr üzrə daha da dərinləşdirilməsi və qarşılıqlı faydalı əməkdaşlığın genişləndirilməsi ilə bağlı fikir mübadiləsi aparıblar.
