Macarıstanın Baş naziri Peter Madyar Seçard şəhərindəki ənənəvi məhsullar festivalında vətəndaşlarla görüşü zamanı hücuma məruz qalıb.
Macarıstanın Baş naziri Peter Madyar Seçard şəhərində keçirilən ənənəvi məhsullar festivalında iştirakçılarla ünsiyyətdə olarkən gözlənilməz hadisə ilə üzləşib. Naməlum şəxs izdihamın arasından çıxaraq baş nazirin üzünə içki töküb.
İnsident zamanı Madyar ətrafındakı insanlarla söhbət edir və onlarla birgə xatirə şəkilləri çəkdirirdi. Hadisə yerində olan mühafizəçilər və təhlükəsizlik xidməti əməkdaşları dərhal müdaxilə edərək hücumu törədən şəxsi festival ərazisindən uzaqlaşdırıblar.
Baş verənlərdən sonra Peter Madyar öz sosial media hesabında paylaşım edərək hadisəyə münasibət bildirib. O, hücumu həyata keçirən şəxsi kəskin şəkildə tənqid edərək onu 'uğursuz Orban döyüşçüsü' adlandırıb.
Madyarın sözlərinə görə, hücum edən şəxs onunla üzbəüz dayanmağa cəsarət etməyib. Baş nazir bildirib ki, izdihamın içində hər kəslə söhbət edib şəkil çəkdirməsi həmin şəxsi narahat etmiş olmalıdır.
“Hamının əyləndiyi, yüzlərlə insanla söhbət etməyimiz və şəkil çəkdirməyimiz həmin şəxsi narahat etmiş olmalı idi. Əlbəttə, yaxınlaşıb gözlərimin içinə baxmağa cəsarət etmirdi. Sərxoş, uğursuz Orban döyüşçüsü cəsarət toplamağa çalışırdı”, - deyə Madyar yazıb.
