Azərbaycan Ordusunun 2023-cü il sentyabrın 19-da Qarabağda başladığı lokal xarakterli antiterror tədbirlərindən 3 il ötür. Həmin əməliyyat nəticəsində ölkə öz suverenliyini tam bərpa edib.
Azərbaycan Ordusunun Qarabağ bölgəsində keçirdiyi lokal xarakterli antiterror tədbirlərinin başlamasından 3 il tamam olur. Bu əməliyyat ölkənin suverenliyinin bərpasında mühüm mərhələ kimi tarixə düşüb.
Əməliyyatdan bir neçə ay öncə Ermənistanın Qarabağ ərazisindəki silahlı birləşmələri Azərbaycan Ordusunun mövqelərini müxtəlif çaplı silahlarla müntəzəm atəşə tuturdu. Paralel olaraq ərazilərin minalanması davam etdirilir, döyüş mövqeləri mühəndis baxımından möhkəmləndirilir, səngər və sığınacaqların sayı artırılırdı.
Bundan əlavə, ermən tərəfi öz mövqelərini əlavə şəxsi heyət, zirehli texnika və artilleriya qurğuları ilə gücləndirir, bölmələrini yüksək döyüş hazırlığına gətirirdi. Səfərbərlik üzrə yeni bölmələr yaradılır, Azərbaycan Ordusuna qarşı kəşfiyyat fəaliyyəti genişləndirilirdi. Eyni zamanda, əvvəllər minalardan təmizlənmiş ərazilər və mülki yollar terror-təxribat məqsədilə yenidən minalanırdı — bütün bu faktlar Azərbaycan tərəfinin apardığı müşahidələrlə təsdiqlənib.
Sentyabrın 19-da Ermənistan silahlı qüvvələrinin Qarabağdakı birləşmələrinin kəşfiyyat-diversiya qrupu Əhmədbəyli-Füzuli-Şuşa avtomobil yolunda əvvəlcədən quraşdırdığı minanı partladıb. Nəticədə Azərbaycan Avtomobil Yolları Dövlət Agentliyinə məxsus nəqliyyat vasitəsi sıradan çıxıb, mülki şəxslər həlak olub.
Elə həmin gün Daxili İşlər Nazirliyi əməkdaşlarını daşıyan avtomobil də ermən kəşfiyyat-diversiya qrupunun qoyduğu minaya düşüb. Bu hadisə nəticəsində bir sıra polis əməkdaşı həlak olub, digərləri yaralanıb.
Yaranmış vəziyyətə cavab olaraq Azərbaycan tərəfi bölgədə lokal xarakterli antiterror tədbirlərinə start verib. Tədbirlərin əsas hədəfləri aşağıdakılar olub:
Tədbirlər çərçivəsində yüksək dəqiqlikli silahların tətbiqi ilə Ermənistan silahlı qüvvələrinin ön xətt və dərinlikdəki mövqeləri, uzunmüddətli atəş nöqtələri, döyüş vasitələri və hərbi obyektləri sıradan çıxarılıb. Bildirilib ki, əməliyyat zamanı mülki əhali və infrastruktur hədəfə alınmayıb, yalnız legitim hərbi obyektlər zərərsizləşdirilib.
2023-cü il sentyabrın 20-də saat 13:00-da tərəflər lokal xarakterli antiterror tədbirlərinin dayandırılması ilə bağlı razılığa gəlib. Razılaşmaya görə:
Sentyabrın 20-də Prezident İlham Əliyev xalqa müraciət edərək bildirib ki, 2023-cü il sentyabrın 19-da təxminən saat 13:00 radələrində başlayan antiterror tədbirləri uğurla başa çatıb və bunun nəticəsində Azərbaycan öz suverenliyini bərpa edib.
Lokal antiterror tədbirləri zamanı Azərbaycan Ordusunun 192 hərbçisi şəhid olub. Bir il sonra, 2024-cü il sentyabrın 19-da Prezident İlham Əliyev “Azərbaycan Respublikasında Dövlət Suverenliyi Gününün təsis edilməsi haqqında” sərəncam imzalayıb.
