Dövlət qulluğuna qəbulda qohumluq qadağası ləğv edilir

Milli Məclisin Hüquq siyasəti və dövlət quruculuğu komitəsinin bu gün keçirdiyi iclasda Dövlət Qulluğu Məcəlləsinin layihəsi müzakirəyə çıxarılıb. Sənəddə dövlət qulluğuna qəbul şərtləri yenidən müəyyənləşdirilir və mövcud qaydalara nisbətən bir sıra fərqlər nəzərdə tutulub.

Hazırkı qanunvericilikdə hansı məhdudiyyətlər var

Qüvvədə olan “Dövlət qulluğu haqqında” Qanuna əsasən, müəyyən şərtlər altında şəxslərin dövlət qulluğuna qəbulu qadağandır. Bu qadağalara aşağıdakılar daxildir:

• şəxsin fəaliyyət qabiliyyətinə malik olmaması və ya məhdud fəaliyyət qabiliyyətinə malik olması məhkəmə qərarı ilə təsdiqlənibsə;
• məhkumluğu ödənilməyib və ya götürülməyibsə;
• bilavasitə tabeliyində və ya nəzarəti altında işləyəcəyi dövlət qulluqçusu ilə yaxın qohumluq və ya qudalıq (ər-arvadlar, valideynlər, qardaş-bacılar, övladlar) əlaqəsi varsa;
• barəsində tibbi xarakterli məcburi tədbirlərin tətbiqinə dair məhkəmənin qanuni qüvvəyə minmiş qərarı olarsa;
• qanunvericiliklə müəyyən edilmiş digər hallarda.

Yeni layihədə hansı dəyişikliklər nəzərdə tutulur

Hazırlanan Dövlət Qulluğu Məcəlləsinin layihəsinə görə isə dövlət qulluğu vəzifəsini tuta bilməyəcək şəxslərin siyahısı bir qədər fərqli formalaşdırılıb. Layihədə bu şəxslər sadalanır:

• digər dövlətin vətəndaşlığını qəbul etmiş və (və ya) digər dövlətlər qarşısında öhdəliyi olan şəxslər;
• fəaliyyət qabiliyyətinə malik olmaması və ya məhdud fəaliyyət qabiliyyətinə malik olması məhkəmənin qanuni qüvvəyə minmiş qərarı ilə təsdiqlənmiş şəxslər;
• məhkumluğu ödənilməmiş və ya götürülməmiş şəxslər;
• barəsində tibbi xarakterli məcburi tədbirlərin tətbiqinə dair məhkəmənin qanuni qüvvəyə minmiş qərarı olan şəxslər;
• siyahısı müvafiq icra hakimiyyəti orqanının müəyyən etdiyi orqan (qurum) tərəfindən müəyyən olunan xəstəlikləri ilə əlaqədar dövlət orqanlarında qulluq keçməyə uyğun olmayan şəxslər;
• qulluq funksiyalarının və vəzifələrinin yerinə yetirilməməsinə, lazımı şəkildə yerinə yetirilməməsinə və ya müəyyən edilmiş məhdudiyyətlərə əməl edilməməsinə görə dövlət qulluğuna xitam verilmiş şəxslər (6 ay ərzində);
• din xadimləri.

Diqqət çəkən məqam ondadır ki, hazırkı qanunda mövcud olan “bilavasitə tabeliyində və ya nəzarəti altında işləyəcəyi dövlət qulluqçusu ilə yaxın qohumluq və ya qudalıq əlaqəsi” bəndi yeni layihənin qadağalar siyahısında yer almır. Bu isə o deməkdir ki, yaxın qohumluq əlaqəsi olan şəxslərin eyni tabelilik zəncirində dövlət qulluğuna qəbulu qadağan edilmir.

65 yaş həddi ilə bağlı qayda saxlanılır

Eyni zamanda qeyd olunub ki, “Dövlət qulluğu haqqında” Qanunda olduğu kimi, Dövlət Qulluğu Məcəlləsinin layihəsində də 65 yaşla bağlı məhdudiyyət öz qüvvəsini saxlayır.