ABŞ Prezidentinin Administrasiyası “Trump TV” adlanan yeni xəbər kanalını fəaliyyətə başladıb, platformada ilk olaraq Donald Trampın iki ay əvvəlki çıxışının videosu yayımlanıb.
ABŞ Prezidentinin Administrasiyası “Trump TV” adlanan xəbər kanalını istifadəyə verib. “The Washington Sun” nəşrinin məlumatına görə, kanalda ilk yayım kimi Prezident Donald Trampın iki ay əvvəl etdiyi çıxışın videoçarxı təqdim olunub.
ABŞ liderinin mətbuat katibi Kaelan Dorr bildirib ki, “Trump TV” vasitəsilə administrasiyanın diqqətçəkən anları senzurasız şəkildə canlı yayımlanacaq. Onun sözlərinə görə, əsas xəbər kanallarının işıqlandırmadığı məqamlar da bu platformada göstəriləcək.
“Bəzi hallarda mətbuat administrasiyanın amerikalıların rifahı naminə əldə etdiyi çoxsaylı rekord nailiyyətlər haqqında qeyri-dəqiq məlumatlar verirdi və ya ümumiyyətlə məlumat vermirdi”
Dorr bu sözləri əlavə edib.
“Trump TV”nin canlı yayımı Ağ Evin “YouTube” kanalı üzərindən həyata keçirilir. Bundan əlavə, kanal Ağ Evin rəsmi mobil tətbiqinin “canlı yayımlar” bölməsində də yerləşdirilib.
Daha əvvəl Prezident Donald Tramp CNN, MSNBC və “Politico” nəşrlərinin jurnalistlərinə Ağ Evə giriş qadağası qoyub. Tramp bu mətbuat orqanlarını administrasiya barədə yalan məlumat yaymaqda ittiham edib.
Buna cavab olaraq həmin mətbuat qurumları jurnalistlərinin Ağ Evə girişinin bərpası üçün Tramp administrasiyasına qarşı məhkəməyə müraciət edib. Digər tərəfdən, ölkənin bir sıra televiziya kanalları həmkarlarına dəstək məqsədilə Trampın çıxışlarını səssiz rejimdə yayımlamağa başlayıb.
