Azərbaycan Həmkarlar İttifaqları Konfederasiyasının (AHİK) təşkilatçılığı ilə 27 Sentyabr Anım Gününə həsr olunmuş "Milli birliyimiz qələbəmizin təməlidir" adlı tədbir keçirilib. Tədbirdə AHİK-in kollektivi, üzv və tabe təşkilatların rəhbərləri, şəhid ailələri və müharibə veteranları iştirak edib.
Azərbaycan Həmkarlar İttifaqları Konfederasiyasının (AHİK) təşkilatçılığı ilə 27 Sentyabr Anım Gününə həsr olunmuş "Milli birliyimiz qələbəmizin təməlidir" adlı tədbir baş tutub.
Tədbirdə AHİK-in kollektivi, üzv və tabe təşkilatların rəhbərləri, şəhid ailələri, habelə müharibə veteranları iştirak edib. Tədbir Ümummilli Lider Heydər Əliyevin və Azərbaycanın ərazi bütövlüyü uğrunda həlak olmuş şəhidlərin xatirəsinə bir dəqiqəlik sükutla başlayıb. Ardından Vətən müharibəsində Azərbaycan əsgərlərinin qəhrəmanlığından bəhs edən film nümayiş olunub.
Konfederasiya sədri Sahib Məmmədov çıxışında Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusunun 44 günlük Vətən müharibəsində qazandığı Zəfərdən, əsgər və zabitlərin rəşadətindən, xalqın nümayiş etdirdiyi birlikdən danışıb. O, bu Qələbənin ölkə tarixinə ən parlaq səhifələrdən biri kimi yazıldığını bildirib.
Məmmədov qeyd edib ki, 27 sentyabrın Anım Günü elan olunması dövlətin şəhidlərin xatirəsinə göstərdiyi ehtiramın ifadəsidir. Çıxışında o, Qarabağ və Şərqi Zəngəzurda aparılan bərpa-quruculuq işlərinə, "Böyük Qayıdış" Proqramının icrasına, habelə şəhid ailələri və müharibə iştirakçılarına dövlət qayğısına toxunub.
Bildirilib ki, Birinci vitse-prezident Mehriban Əliyevanın təşəbbüsü ilə Heydər Əliyev Fondu şəhid ailələrini və müharibə iştirakçılarını əhatə edən çoxsaylı layihələr həyata keçirir. Bundan başqa, AHİK-in şəhid ailələrinə dəstək məqsədilə gördüyü işlər barədə də iştirakçılara məlumat verilib.
Müharibə, Əmək və Silahlı Qüvvələr Veteranları Təşkilatının sədri, ehtiyatda olan polkovnik Cəlil Xəlilov çıxışında əks-hücum əməliyyatlarının əhəmiyyətindən, Azərbaycan Ordusunun qəhrəmanlığından və hərbçilərin tarixi Zəfərin qazanılmasındakı rolundan danışıb.
Vətən müharibəsi veteranı, ehtiyatda olan polkovnik-leytenant Sahil Xəlilov öz döyüş yolunu və cəbhə xatirələrini bölüşərək qəhrəmanların gələcək nəsillər üçün nümunə olduğunu vurğulayıb. Şəhid Nurid Abdullayevin həyat yoldaşı Vəfa Abdullayeva isə ərinə dair xatirələrini danışıb, şəhid ailələrinə göstərilən dövlət diqqətindən söz açıb.
Şəhid gizir Telman Kəlbiyevin oğlu Elcan Kəlbiyev Vətənə həsr olunmuş şeir söyləyib, qazi polkovnik Əhməd Şərifovun oğlu Əli Şərifzadə isə "Ey Vətən" mahnısını ifa edib. Hər iki çıxış iştirakçılar tərəfindən alqışlarla qarşılanıb.
