Bakının Yasamal və Nizami rayonlarına daxil olan bir sıra küçələrdə bu gün elektrik enerjisinin verilişində müvəqqəti fasilə yaranacaq.
"Azərişıq" ASC-nin yaydığı məlumata görə, paytaxtın müəyyən ərazilərində elektrik təchizatında qısamüddətli məhdudiyyət tətbiq ediləcək. Bunun səbəbi Yasamal və Nizami rayonlarındakı bəzi transformator məntəqələrində aparılacaq təmir-təftiş işləridir.
Yasamal Rayon Enerji Təchizatı və Satışı İdarəsinin xidmət ərazisində saat 10:00-dan 13:00-dək enerji verilişi məhdudlaşdırılacaq. Bu, Arif Mehdiyev, Əsəd Əhmədov və Zahid Xəlilov küçələrinə, həmçinin Hüseyn Cavid və Mətbuat prospektlərinin bir hissəsinə aiddir.
Nizami Rayon Enerji Təchizatı və Satışı İdarəsinə aid ərazilərdə isə saat 10:00-dan 14:00-dək elektrik enerjisinin verilişi tamamilə dayandırılacaq. Bu, Babək prospektinin bəzi hissələrini, eləcə də Keşlə qəsəbəsindəki 1-ci və 4-cü Köndələn küçələrini əhatə edir.
Bildirilib ki, işlər elektrik enerjisinin keyfiyyət göstəricilərinin yüksəldilməsi və artan yük tələbatının qarşılanması məqsədilə aparılır. Təmir-təftiş işləri başa çatdıqdan sonra bu ərazilərdə yaşayan abonentlərin daha keyfiyyətli və dayanıqlı elektrik enerjisi ilə təmin olunacağı qeyd olunub.
