Ziya Bünyadov prospektinin bir hissəsində avtobus zolağının fəaliyyət müddəti axşamlar bir saat uzadılıb.
Avtomobil Yolları Dövlət Agentliyi (AYNA) Ziya Bünyadov prospektində hərəkətlə bağlı yeniliyi açıqlayıb. Məlumata görə, avtobusların cədvələ uyğun, gecikmədən hərəkət etməsini təmin etmək məqsədilə müəyyən yol sahəsində xüsusi zolağın qüvvədə olma vaxtı dəyişdirilib.
Dəyişiklik Ziya Bünyadov prospektinin Atatürk prospekti ilə kəsişdiyi nöqtədən Azadlıq prospekti ilə kəsişməsinədək olan hissəni əhatə edir. Söhbət “20 Yanvar” metrostansiyası istiqamətində hərəkət edən yol seqmentindən gedir.
Bu hissədə axşam saatlarında avtobus zolağının işləmə müddəti bir saat artırılıb. Uyğun olaraq, həmin ərazidə yerləşən yol nişanında da lazımi düzəliş edilib.
Əvvəllər xüsusi hərəkət zolağı axşamlar saat 17:00-dan 20:00-a qədər qüvvədə idi. İndi isə bu müddət saat 17:00-dan 21:00-a qədər uzadılıb.
Agentlik sürücülərdən yeni qaydanı nəzərə alaraq yol hərəkəti zamanı diqqətli olmalarını xahiş edib.
