Bakının Sabunçu rayonundakı Maştağa qəsəbəsində fərdi yaşayış evində partlayış baş verib, nəticədə 2 nəfər xəsarət alıb.
Bakı şəhərinin Sabunçu rayonuna aid Maştağa qəsəbəsində yerləşən fərdi yaşayış evində partlayış qeydə alınıb. Fövqəladə Hallar Nazirliyi bu barədə rəsmi məlumat yayıb.
Nazirliyin açıqlamasına görə, hadisə yerinə Dövlət Yanğından Mühafizə Xidmətinin əməkdaşları cəlb olunub. Ərazidə əməliyyat şəraiti qiymətləndirilərkən məlum olub ki, ümumi sahəsi 100 kvadratmetr olan birmərtəbəli evdə yanğın olmadan partlayış baş verib.
Partlayışın təsiri nəticəsində yaşayış evinə maddi ziyan dəyib. Hadisə zamanı 2 nəfər xəsarət alıb.
FHN əməkdaşları hadisə yerində lazımi təhlükəsizlik tədbirlərini həyata keçiriblər. Bu tədbirlər ərazidə əlavə risklərin qarşısını almaq məqsədilə görülüb.
Partlayışın səbəblərini müəyyənləşdirmək üçün aidiyyəti dövlət qurumları tərəfindən araşdırma aparılır. Hazırda hadisə ilə bağlı əlavə təfərrüatlar açıqlanmayıb.
