Azərbaycan prokurorluğunun əməkdaşları milli prokurorluq orqanlarının yaradılmasının 108-ci ildönümü münasibətilə Abşeron yarımadası və Naxçıvan Muxtar Respublikasında ağacəkmə aksiyası keçiriblər.
Azərbaycan prokurorluğunun əməkdaşları geniş miqyaslı ağacəkmə tədbiri təşkil ediblər. Aksiya milli prokurorluq orqanlarının yaradılmasının 108-ci ildönümünə, eləcə də 1 oktyabr – prokurorluq işçilərinin peşə bayramı gününə həsr olunub.
Tədbirdə Baş Prokurorluğun, Hərbi Prokurorluğun və Baş prokuror yanında Korrupsiyaya qarşı Mübarizə Baş İdarəsinin nümayəndələri iştirak ediblər. Onlara Bakı şəhər prokurorluğu və paytaxtın tabeliyində olan rayon prokurorluqlarının əməkdaşları, habelə prokurorluğun veteranları qoşulub.
Aksiyaya Ekologiya və Təbii Sərvətlər Nazirliyinin rəhbərliyi və işçiləri, bundan başqa könüllülər də dəstək verib.
Ağacəkmə işləri Abşeron yarımadasında və Naxçıvan Muxtar Respublikasında aparılıb. Hər bölgənin torpaq və iqlim xüsusiyyətləri nəzərə alınaraq, ümumilikdə 1200-dən artıq zeytun və Eldar şamı fidanı torpağa əkilib.
Aksiya başa çatdıqdan sonra Baş prokuror Kamran Əliyev prokurorluğun veteranları ilə görüşüb. Görüş zamanı tərəflər arasında səmimi söhbət aparılıb.
