Goranboy rayonu Təhsil Sektorunun inzibati binasında vətəndaş qəbulu zamanı valideynlərlə sektor əməkdaşı arasında insident yaşanıb, hadisə vətəndaş tərəfindən video lentə alınıb.
Goranboy rayon Təhsil Sektorunun inzibati binasında vətəndaşlarla təhsil işçisi arasında münaqişə yaşanıb. Baş verənlər bu günlərdə vətəndaşlardan biri tərəfindən kamera ilə çəkilib.
İlkin məlumata əsasən, insident sektor müdiri Vüsal Cəfərovun qəbuluna gələn vətəndaşla sektorun əməkdaşı Seymur Həsənov arasında yaşanıb. Görüntülər sonradan ictimaiyyətə yayılıb.
Gəncə-Daşkəsən Regional Təhsil İdarəsi məsələ ilə bağlı sorğuya cavab verərək hadisənin təfərrüatını açıqlayıb. Bildirilib ki, insident Goranboy şəhəri 1 nömrəli tam orta ümumtəhsil məktəbində bəzi siniflərin ikinci növbəyə keçirilməsi ilə əlaqədar narazı olan bir qrup valideynin qəbul otağına növbədənkənar daxil olması zamanı baş verib.
Həmin vaxt vətəndaş qəbulu prosesi həyata keçirildiyindən növbə qaydalarına riayət etmədən qəbul otağına daxil olan valideynlərlə vətəndaş qəbulunu təşkil edən sektor əməkdaşı arasında münaqişə yaranıb. Hazırda hadisə ilə bağlı daxili araşdırma aparılır.
Regional Təhsil İdarəsinin məlumatına görə, hazırda bu insidentlə bağlı daxili yoxlama davam etdirilir və nəticələr sonradan açıqlanacaq.
