ABŞ-nin Azərbaycandakı müvəqqəti işlər vəkili Emi Karlon bildirib ki, Birləşmiş Ştatlar Cənubi Qafqaz regionunu artıq mühüm prioritet kimi qəbul edir.
ABŞ-nin Azərbaycandakı müvəqqəti işlər vəkili Emi Karlon bildirib ki, Birləşmiş Ştatlar Cənubi Qafqaz regionuna həmişəkindən daha böyük diqqət yetirir. Diplomat bunu "Orta Dəhliz: ticarət, sənaye və bağlantı potensialının reallaşdırılması" mövzusunda keçirilən sessiyada deyib.
Emi Karlon qeyd edib ki, 2025-ci ilin avqust ayından etibarən Vitse-prezident Ceyms Devid Vensin regiona səfəri, ilk dəfə keçirilən iqtisadi dialoq və bundan sonra baş verən bütün əlaqələr Vaşinqtonun Cənubi Qafqaza artan marağının göstəricisidir.
"2025-ci ilin avqustundan başlamaqla Vitse-prezident Ceyms Devid Vensin səfəri, keçirdiyimiz ilk iqtisadi dialoq və sonrakı bütün təmaslar göstərir ki, Birləşmiş Ştatlar artıq Cənubi Qafqaz regionunu nə qədər böyük prioritet hesab edir"
Diplomat Nyu-Yorkda BMT Baş Assambleyası çərçivəsində keçirilən və TRIPP layihəsinə həsr olunmuş tədbiri xatırladıb. O bildirib ki, Prezident Donald Trampın çıxışında da avqust ayında Azərbaycan və Ermənistan arasında əldə edilmiş razılaşmanın şahidi olmaqdan qürur duyduğu vurğulanıb.
"Xəbərləri izləyənlər bilir ki, dünən Nyu-Yorkda BMT Baş Assambleyası çərçivəsində TRIPP layihəsinə həsr olunmuş böyük bir tədbir keçirildi. Prezident Trampın çıxışını gördünüzsə, o da avqust ayında Azərbaycan və Ermənistan arasında əldə olunmuş razılaşmanın şahidi olmaqdan qürur duyduğunu vurğuladı."
Emi Karlon vurğulayıb ki, bu proses müvəqqəti xarakter daşımır və ABŞ hökuməti üçün yeni bir strateji istiqamətə çevrilib. Onun sözlərinə görə, Vaşinqton Cənubi Qafqaz regionunun və Trans-Xəzər ticarət dəhlizinin böyük potensialını görür.
"Bu, müvəqqəti bir proses deyil. ABŞ hökuməti üçün yeni bir diqqət mərkəzidir, çünki biz Cənubi Qafqaz regionunun və bu Trans-Xəzər ticarət dəhlizinin böyük potensialını görürük. Bu həmçinin ABŞ biznesi üçün yeni imkanlar, birgə firavanlıq və regiona sülh ilə yeni imkanlar gətirmək şansıdır."
