Xəzər dənizində keçirilən hərbi təlimlər zamanı hərbçilərin həlak olması ilə əlaqədar Qazaxıstan Silahlı Qüvvələrinin 5 məsul vəzifəli şəxsi saxlanılıb.
Qazaxıstanın Daxili İşlər Nazirliyi Xəzər dənizindəki hərbi təlimlər zamanı baş verən faciə ilə bağlı istintaq tədbirləri barədə məlumat yayıb. Açıqlamaya görə, hadisə ilə əlaqədar ölkənin Silahlı Qüvvələrindən 5 məsul şəxs həbs edilib.
Saxlanılanlar xidməti vəzifə borcuna səhlənkar yanaşma və nəticədə ağır fəsadlara gətirib çıxaran gəmiçilik qaydalarının pozulmasında şübhəli bilinir.
Nazirliyin məlumatına əsasən, tutulan şəxslərin sırasında Qazaxıstan Hərbi-Dəniz Qüvvələri Baş Komandanının birinci müavini vəzifəsini tutan Qərargah rəisi də yer alır. Bundan başqa, iki hərbi hissənin komandiri, dəniz piyadası bölüyünün komandiri və qayığın komandiri də saxlanılıblar.
Hazırda bütün şübhəli şəxslər təcridxanaya göndərilib.
Sentyabrın 24-də Qazaxıstanın Xəzər dənizində keçirdiyi hərbi təlimlər zamanı hava şəraiti qəflətən pisləşib. Kəskin dalğalanma nəticəsində 19 hərbçi dənizə düşüb.
Bu təbii fəlakət nəticəsində 12 hərbi qulluqçu həyatını itirib. Hazırda hadisə ilə bağlı istintaq davam edir.
