İnfantino islahat planını FIFA-ya təqdim etdi

FIFA prezidenti Canni İnfantino təşkilatın idarəetmə tərzi və qərarların qəbul edilmə qaydası ilə bağlı gələn tənqidlərə cavab olaraq yeni addım atıb. O, üzv federasiyalarla açıq dialoq qurulmasını və struktur islahatların aparılmasını təklif edib.

İnfantino 211 üzv federasiyaya, həmçinin FIFA Şurasına ünvanladığı məktubda konfederasiyalar, üzv federasiyalar və digər maraqlı tərəflərlə birbaşa əlaqə quran, müəyyən vaxt çərçivəsinə malik məsləhətləşmə mexanizminin yaradılmasını irəli sürüb.

Onun sözlərinə görə, təkliflər institusional proseslərdə daha erkən mərhələdən iştirakı, prezident, Büro, Şura və Konqres arasında səlahiyyət bölgüsünün aydınlaşdırılmasını nəzərdə tutur. Bundan əlavə, əsas strateji addımlarda şəffaflığın, iştirakçılığın və hesabatlılığın artırılması da planlaşdırılır.

Təkliflər oktyabrda müzakirə olunacaq

İnfantino bu ilkin təkliflərin oktyabrın 15-də keçiriləcək FIFA Şurasının növbəti iclasında müzakirəyə çıxarılmasını istəyib.

“Gələn ay FIFA Şurasının iclası var və bu vacib məsələlər üzrə dialoqu davam etdirəcəyik. Bir-birimizə qulaq asmaq və hörmət etmək mədəniyyəti yaradılmalıdır”

Tənqidlərin kökündə nə dayanır?

İnfantinonun rəhbərliyinə qarşı narazılıqlar iyul ayının sonlarında gündəmə gələn kommersiya layihəsindən sonra kəskin şəkildə artıb. Həmin layihəyə görə, Dünya Çempionatının kommersiya hüquqlarının 20 faizi özəl investorlara 4,2 milyard dollara satılmalı idi.

Eyni zamanda Dünya Çempionatı və Klublararası Dünya Çempionatının idarə edilməsi üçün “FIFA Forward Enterprise” adlı ayrıca kommersiya şirkətinin qurulması nəzərdə tutulub. Məhz bu plan geniş müzakirələrə səbəb olub.

Seçki yarışı yaxınlaşır

Sentyabr ayının əvvəlində FIFA açıqlayıb ki, İnfantino gələn ilin martında keçiriləcək prezident seçkilərində yenidən namizəd olacaq. Hazırda o, yeganə elan olunmuş namizəddir, lakin KONKAKAF prezidenti Viktor Montalyaninin onunla rəqabətə girəcəyi gözlənilir.