"AZCON Holding"in tərkibinə daxil olan "Azərbaycan Hava Yolları" QSC (AZAL) 2026-cı il "World Airline Awards" mükafatları çərçivəsində "Mərkəzi Asiya və MDB-nin ən yaxşı regional aviaşirkəti" adına layiq görülüb.
Mükafatlandırma mərasimi Londonda, "The Langham" otelində baş tutub. Tədbirin təşkilatçısı beynəlxalq hava nəqliyyatı reytinq qurumu olan "Skytrax" olub.
Aviaşirkətə verilən bu mükafat onun donanmasını yeniləmək, uçuş marşrutlarını genişləndirmək və sərnişinlərə göstərilən xidmətin səviyyəsini artırmaq istiqamətində gördüyü işlərin nəticəsi kimi dəyərləndirilir.
"Skytrax"ın baş icraçı direktoru Edvard Pleysted aviaşirkətin regionda tutduğu yeri belə şərh edib:
"Azərbaycan Hava Yolları Mərkəzi Asiya və MDB-də regional aviaşirkət xidmətləri sahəsində nümunəvi mövqeyini möhkəmləndirib. Bu mükafat aviaşirkətin donanmasını və marşrut şəbəkəsini genişləndirməklə, eləcə də xidmət keyfiyyətini yüksəltməklə davamlı inkişafa sadiqliyini nümayiş etdirir"
AZAL-ın İdarə Heyətinin sədri Samir Rzayev mükafatı komandanın əməyi ilə əlaqələndirib və bildirib:
"Bu uğur hər gün fədakar əməyi ilə sərnişinlərimizin səyahət təcrübəsini formalaşdıran əməkdaşlarımıza məxsusdur. Bu həm də sərnişinlərin "Azərbaycan Hava Yolları"na göstərdiyi etimadın ifadəsidir. Yeni təyyarələrə investisiya yatırarkən, marşrut şəbəkəmizi genişləndirərkən və xidmətlərimizi təkmilləşdirərkən əsas diqqətimizi hər bir səyahəti daha təhlükəsiz, daha rahat və daha əlverişli etməyə yönəldirik. Bu mükafatı almaqdan qürur duyur və göstərilən etimadı bundan sonra da doğrultmaq üçün böyük əzmlə çalışırıq"
Ölkənin milli aviadaşıyıcısı Azərbaycanın xarici bazarlarla əlaqələrini gücləndirməkdə öz rolunu davam etdirir. Şirkətin əsas inkişaf hədəfləri arasında donanmanın yenilənməsi və uçuş şəbəkəsinin genişləndirilməsi ilə yanaşı, təyyarə göyərtəsindəki xidmətlərin və rəqəmsal həllərin təkmilləşdirilməsi də yer alır.
Bu addımlar sərnişinlərə daha çox seçim imkanı yaratmaqla yanaşı, səyahətin bütün mərhələlərində daha rahat təcrübə əldə etmələrinə şərait yaradır.
