Nizami rayonunda 20 Sentyabr – Azərbaycanda Dövlət Suverenliyi Günü münasibətilə "Zəfərlə ucalan Azərbaycan və suverenlikdən doğan güc" mövzusunda konfrans təşkil olunub.
Nizami Rayon İcra Hakimiyyəti və Yeni Azərbaycan Partiyasının Nizami rayon təşkilatı birgə şəkildə Dövlət Suverenliyi Gününə həsr olunmuş konfrans keçirib. Tədbirdə Milli Məclisin deputatları, rayon sakinləri, şəhid ailələrinin üzvləri, qazilər və gənclər iştirak edib.
Konfrans Dövlət Himninin səslənməsi ilə başlayıb. Ulu Öndər Heydər Əliyevin və Vətənin azadlığı, ərazi bütövlüyü, suverenliyi yolunda həlak olmuş şəhidlərin xatirəsi bir dəqiqəlik sükutla yad edilib. Ardınca Dövlət Suverenliyi Gününə həsr olunmuş video-film nümayiş etdirilib.
Tədbirdə çıxış edənlər arasında Milli Məclis sədrinin birinci müavini Əli Əhmədov, Nizami Rayon İcra Hakimiyyətinin başçısı Coşqun Cəbrayılov, deputatlar Rasim Musabəyov və Məlahət İbrahimqızı, YAP Nizami rayon təşkilatının sədr müavini Rəşadət Xalıqov olub. Onlara şəhid Cavid Manafovun anası Natəvan İbrahimova, Vətən müharibəsi qəhrəmanı polkovnik-leytenant Zaur Hüseynov və Azərbaycan Universitetinin tələbəsi Adəm Quliyev də qoşulub, sonuncu gənclər adından söz alıb.
Çıxışlarda bildirilib ki, 2023-cü ilin sentyabrında keçirilmiş lokal xarakterli antiterror tədbirləri nəticəsində Azərbaycan öz suverenliyini ölkənin bütün ərazisində – Xankəndi, Xocalı, Xocavənd və Ağdərədə də daxil olmaqla – tam bərpa edib. Üçrəngli bayrağın bütün suveren torpaqlarda dalğalandığı qeyd olunub.
Natiqlər ərazi bütövlüyünün və suverenliyin tam bərpasının ölkənin çoxəsrlik tarixində keyfiyyətcə yeni mərhələ açdığını, bununla Cənubi Qafqazda yeni təhlükəsizlik arxitekturasının formalaşdırıldığını diqqətə çatdırıb.
Tədbirdə Prezident, Müzəffər Ali Baş Komandan İlham Əliyevin milli maraqlara söykənən siyasəti sayəsində Azərbaycanın bütün xarici təzyiqlərə sinə gərərək hüquqlarını beynəlxalq arenada qoruduğu bildirilib. Vurğulanıb ki, ölkə qlobal miqyasda ədalətin və beynəlxalq hüququn aliliyinin müdafiəçisi kimi çıxış edib.
Çıxışçılar Azərbaycan xalqının Prezidentin rəhbərliyi ilə tarixinin ən qürurlu dövrünü yaşadığını, Cənubi Qafqazın lider dövləti olan ölkənin daha güclü, təhlükəsiz və rifah içində yaşayacaq yeni Azərbaycan naminə sülh siyasətini uğurla davam etdirdiyini bildirib.
Qeyd olunub ki, Azərbaycan Prezidentinin 19 sentyabr 2024-cü il tarixli Sərəncamı ilə 20 Sentyabr Azərbaycan Respublikasında Dövlət Suverenliyi Günü kimi təsis edilib. Bu addım Zəfər tariximizin qalibiyyət təntənəsinin təcəssümü, xalqın tarixi iradəsinin, azadlıq sevgisinin və milli dövlətçilik düşüncəsinin rəmzi kimi dəyərləndirilib.
Çıxışlarda bildirilib ki, qəhrəman əsgər və zabitlərin, şəhidlərin qanı hesabına qazanılmış ərazi bütövlüyü və suverenlik xalqın milli sərvətidir. Azərbaycan xalqı üçün suverenliyin sadəcə siyasi status deyil, həm də milli qürur, kimlik və gələcək nəsillərə miras qoyulan müqəddəs dəyər olduğu, bu dəyərin qorunmasının hər bir azərbaycanlının borcu olduğu vurğulanıb.
