Prezident İlham Əliyev bildirib ki, son 20 ildə görülən işlər sayəsində Azərbaycan əsas infrastruktur layihələrini icra edərək enerji təhlükəsizliyini tam təmin edib.
Prezident İlham Əliyev bildirib ki, son 20 ildə görülən işlər sayəsində Azərbaycan əsas infrastruktur layihələrini icra edib. Dövlət başçısı bunu dağ-mədən və metallurgiya sənayesinin inkişafına dair Dövlət Proqramına həsr olunmuş müşavirədə deyib.
“Bir daha demək istəyirəm, bu 20 il ərzində görülmüş işlər imkan verdi ki, biz əsas infrastruktur layihələrimizi icra etdik. O vaxt xaricdən həm təbii qaz, həm də elektrik enerjisi alırdıq”
Dövlət başçısı vurğulayıb ki, keçmişdə ölkənin öz imkanları çox məhdud olub. Onun sözlərinə görə, bu gün vəziyyət tamamilə fərqlidir.
“Bu gün isə ölkəmizdə qazlaşmanın səviyyəsi 96 faizdir və biz 25 milyard kubmetrdən çox qaz ixrac edirik. Daxili tələbat bundan qat-qat aşağıdır. Biz elektrik enerjisi ilə bağlı bütün məsələləri həll etdik və çox güclü potensial yaratdıq. Bu gün bizdə ehtiyat generasiya gücləri kifayət qədər böyükdür”
Prezident bildirib ki, hazırda müəyyən həcmdə elektrik enerjisi ixracı həyata keçirilir, lakin gələcək illərdə bu ixracın miqyası daha da genişlənəcək. O, bunun səbəbini dünya bazarlarında enerji resurslarına dair yaranan qıtlıq və narahatlıqla əlaqələndirib.
“Yəni dünya mənzərəsi göz önündədir. Ona görə bütün bu işlərin vaxtında görülməsi ilə bağlı atdığımız addımlar bizi böyük problemlərdən sığortaladı”
İlham Əliyev qeyd edib ki, əgər bu addımlar vaxtında atılmasaydı, ölkə ciddi çətinliklərlə üzləşə bilərdi.
“Təsəvvür edin ki, əgər bunları etməsəydik, bu gün biz çox çətin vəziyyətə düşə bilərdik və bəzi ölkələr kimi qapı-qapı gəzib xahiş-minnət edərək öz enerji təhlükəsizliyimizi təmin etmək üçün gərək kiməsə ağız açaydıq”
Dövlət başçısı bildirib ki, hazırkı mənzərə tamamilə fərqlidir və Azərbaycana çoxsaylı müraciətlər daxil olur.
“Bu gün isə mənzərə tam fərqlidir. Bizə çoxlu müraciətlər daxil olur və biz təbii ki, imkan daxilində kömək göstəririk, göstərəcəyik. Təbii ki, bizim həm rolumuz artır, həm nüfuzumuz artır və eyni zamanda, bütün tərəfdaşlar görürlər ki, Azərbaycan son illər ərzində nə qədər irəliyə gedib, nə qədər güclənib ki, bu gün nəinki öz tələbatını tam təmin edir, eyni zamanda, bir çox ölkələr üçün enerji sahəsində əvəzolunmaz tərəfdaşa çevrilib”
Prezident bu sözləri müşavirə çərçivəsində edilən çıxışında vurğulayıb.
