Əmək və Əhalinin Sosial Müdafiəsi Nazirliyinin tabeliyində olan Dövlət Məşğulluq Agentliyi Cəbrayıl rayonunda özünüməşğulluq proqramı çərçivəsində qurulmuş kiçik biznes sahələrinə media nümayəndələri üçün tur təşkil edib.
Dövlət Məşğulluq Agentliyi Cəbrayıl rayonunda özünüməşğulluq proqramı əsasında yaradılmış kiçik biznes obyektlərinə jurnalistlərin baş çəkməsini təmin edib. Tədbir çərçivəsində işğaldan azad edilmiş ərazilərə köçürülmüş sakinlərin məşğulluğunun artırılması istiqamətində görülən işlər barədə ətraflı məlumat verilib.
Bildirilib ki, həmin ərazilərdən köçürülmüş vətəndaşlar arasında artıq 12 minə yaxın nəfərin işlə təminatı reallaşdırılıb. Bu şəxslərdən 1051 nəfəri üçün özünüməşğulluq proqramı vasitəsilə kiçik ailə təsərrüfatları yaradılıb, 598 nəfər isə əmək bazarının ehtiyaclarına cavab verən sahələr üzrə hazırlıq kurslarına yönləndirilib.
Media nümayəndələri proqram çərçivəsində avadanlıqla təmin olunmuş dörd Cəbrayıl sakininin - Ətrabə Mirkişiyeva, Elbrus Cəfərli, İlham Həmidov və Bayram Əliyevin fəaliyyət göstərdiyi obyektlərlə tanış olublar.
Bu dörd sahə dövlətin verdiyi aktivlər əsasında qurulub və hazırda fəaliyyət göstərir.
Proqram iştirakçıları doğma torpaqlarında öz işlərini qurmalarından qürur duyduqlarını bildiriblər. Onlar bu prosesdə dövlətin dəstəyini daim hiss etdiklərini vurğulayıb, təsərrüfatlarının yaradılmasına göstərilən köməyə görə Prezident İlham Əliyevə təşəkkürlərini çatdırıblar.
Məlumata görə, Cəbrayıl rayonuna köçürülmüş sakinlərdən 2147 nəfəri məşğulluq tədbirlərinə cəlb edilib. Bunlardan 93 nəfər üçün özünüməşğulluq proqramı əsasında kiçik ailə təsərrüfatları qurulub.
