"AzerGold" QSC-nin İdarə Heyətinin sədri Zakir İbrahimov bildirib ki, Daşkəsən dəmir filizi layihəsi çərçivəsində ilk məhsul 2030-cu ildə istehsal olunacaq.
"AzerGold" QSC-nin İdarə Heyətinin sədri Zakir İbrahimov bu gün keçirilən brifinqdə Daşkəsən dəmir filizi layihəsinin təfərrüatlarını açıqlayıb. Onun sözlərinə görə, layihə mədən, zənginləşdirmə zavodu, boru kəməri, pellet zavodu və isti briketləşdirilmiş dəmir (İBD) zavodunu əhatə edir.
İbrahimov qeyd edib ki, 20 illik istismar dövrü ərzində ümumilikdə 40 milyon ton İBD məhsulunun istehsal olunması planlaşdırılır. Layihənin iqtisadi dəyəri 24 milyard manat, buna görə lazım olan investisiyanın həcmi isə 1,95 milyard manat təşkil edir.
Maliyyələşmə dövlət büdcəsi, borc vəsaitləri və investorların iştirakı hesabına təmin ediləcək. Layihəyə əsasən, Daşkəsən mədənindən çıxarılan filiz əvvəlcə mədənin ərazisində inşa ediləcək zənginləşdirmə zavodunda emal olunaraq konsentrata çevriləcək. Daha sonra konsentrat pellet istehsalı üçün Şəmkir rayonunda tikilməsi nəzərdə tutulan zavoda nəql ediləcək. Bu məqsədlə ölkədə ilk dəfə uzunluğu 40 kilometrdən çox olacaq şlam boru kəmərinin inşası planlaşdırılır. İstehsal zəncirinin son mərhələsində isə pelletdən polad sənayesi üçün əsas xammallardan biri olan isti briketləşdirilmiş dəmir istehsal ediləcək.
Sədrin sözlərinə görə, illik istehsal gücü 2 milyon ton olacaq zavod Qərb Sənaye Parkının Şəmkir rayonu ərazisinə düşən hissəsində inşa ediləcək. Bu, ölkədə yüksək keyfiyyətli polad istehsalı üçün dayanıqlı xammal bazasının yaradılmasına şərait yaradacaq.
Yəni, istehsal olunacaq illik 2 milyon ton həcmində məhsul daxili bazarın tələbatı ödəyəcək, üstəlik tələbatdan artıq məhsullar ixracata yönəldiləcək. Bu isə bir tərəfdən idxaldan asılılığın azalmasına, digər tərəfdən isə ixrac potensialının genişlənməsinə, qeyri-neft sektorunun inkişafına və dövlət büdcəsinə əlavə gəlirlərin təmin edilməsinə mühüm töhfə verəcək.
Beləliklə, Daşkəsən dəmir filizi layihəsi ölkənin metallurgiya sənayesi üçün strateji əhəmiyyət daşıyan infrastruktur layihəsi kimi dəyərləndirilir.
